الحكومة ليه عملت قانون تظاهر وفيه عقوبات للتخريب في قانون العقوبات.
سؤال وجيه برضه
الأول الفكرة كانت مابتمسكش اللي بيكسر ويخرب في المظاهرات ليه وسايبينهم علينا ولا بيساومونا علي حريتنا ….الخ
أقولك انا ليه لأنه مجهود ضايع هتمسك الناس وفي الآخر مش هتقدر تثبت عليهم التخريب برغم وقوعه كل واحد هيقول زي ماكان بيتقال طول تلات سنين هو صحيح المجمع العلمي اتحرق بس مش احنا اللي حرقناه دول مجهولين واحنا كنا بنتظاهر بأدب ،هو صحيح اتكسرت الجامعة بس دول مخربين من برة لكن الجماعة الاخوانجية كانوا يا عيني واقفين مع المخربين وبيهتفوا بس، هو صحيح المتحف المصري كان بيتسرق لكن الحرامية مش احنا …الخ طيب ولو فرضنا انا هاعرف المجرم ازاي وانت واقف تحرسه وعامل تجمهر ومش عاوز تسلمه ولا عاوز تدينه ولا عاوز تشهد ضده؟ وحتي لو مسكت حد بتطلع انت تشكك في انه عمل حاجة حتي لو متصور او معترف زي دومة؟
فبالتالي التجمع اللي موجود في مكان التخريب اللي هو برضه مكان المظاهرة موجود عن عمد وهدفه هو اعطاء غطاء للعنف والتشكيك في صحة ادانة المجرم حتي لو تم القبض عليه وتفريق مسئولية الدم والتخريب بين القبائل.
فالقانون عشان يغطي النقطة دي خلاك تنزل المظاهرة بعد ماتاخد ترخيص وتبقي مسئول عن المجموعة اللي معاك.
اللي رفضوا القانون معظمهم مش عاوز يتحمل اي مسئولية عن افعاله ومعظمهم نازل بكرة عشان يتظاهر بدون تصريح عشان يدي مكاسب للاخوان كالعادة.
وده بقي السبب في وجود القانون ده انك لو عاوز القضايا ماتبقاش ملفاتها مفتوحة وتبقي عارف مسئولين محددين عن اللي يتقتل او يتصاب او الحاجة اللي تتخرب وتتحرق يبقي لازم كل تجمع يبقي معروف انه نازل ومايشيلش سلاح وفيه مسئول قدام الناس.
واللي مش عاوز القوانين تتطبق عليه يتعاقب بقي عشان يبطل يبقي غطاء للاخوان اللي كدة كدة بينزلوا للتخريب
