Ahmed Said

احداث مصر

قناة الجزيرة خطر على الامن القومي

إمبارح وأنا قاعد مستنى مُسلسل اسم مؤقت على التلفزيون (ماعنديش نت فى البيت ومُضطر بقى)، قولت أمّا أقلّب وأشوف الجزيرة بتهرى فى أيه، لقيت مُذيع القناة مستضيف واحد مسمى نفسه خبير أمنى، وواحد تانى تقريبًا كده من بتوع قضاه من أجل الإخوان. المذيع بيقول ياسيادة اللواء نعلم جيدًا بوجود إنشقاقات فى صفوف وقادة الجيش المصرى لكنها غير مؤكدة (نعلم جيدًا وغير مؤكدة! الإتنين فى بوء واحد)، ولحد مايظهر فيديو عن إعلان إنشقاقات وقتها هنتأكّد، أيه تعليق حضرتك، هل فعلًا فى إنشقاق داخل الجيش؟ رد عليه عم الهرّاى الأمنى وقاله طبعًا، وفى قطاع كبير من الجيش رافض موقف القيادة العامة وفى غليان كمان، ومنطقى زى مافى مؤيدين للفريق السيسى من داخل الجيش أكيد فى مؤيدين لشرعية الرئيس مُرسى. فالمذيع وجّه سؤال لبتاع قضاة من أجل جزمة المُرشد، وبيقوله عندك رسالة توجهها للجيش المصرى؟ قاله اكيد، أنا بناشد جيشنا العظيم بالعودة لثكناته والحفاظ عليه متماسكًا قبل مايتحول لجيش سورى وده طبعًا مانخشاه!

المشهد بقى باين جدًا للأعمى:
1. مافيش شك ولو بنِسبة 0.1% إن الجزيرة هىّ السبب الرئيسى للإقتال فى سوريا عن طريق بثها لفيديوهات مُفبركة عن وجود إنشقاقات داخل الجيش النظامى.
2. ماعنديش شك برضو إن ده هيحصل فى الأيام الجاية عن الجيش المصرى (هما شغاليين تمهيد لكده طول ال 24 ساعة، بس حظهم أسود، عندنا مخابرات شايفه شغلها كويّس).
3. الجزيرة ليها خطة واضحه من سنين (القضاء على الجيوش العربية)، ونِجحوا فى العراق، وبيحاولوا فى سوريا، وهيحاولوا فى مصر.
حاليًا هىّ المنبر الوحيد للإسلامجية; لبث السموم وغسل إمخاخ الناس (بعد غلق القنوات الدينية طبعًا). الجزيرة بتمثّل أكبر خطر على الأمن القومى المصرى فى الوقت الحالى.

اقرأ ايضاً صفحات رأي متعلقة على جريدة احداث اليوم:

اضيف بتاريخ: Saturday, July 20th, 2013 في 16:05

كلمات جريدة احداث: ,

2 رد to “قناة الجزيرة خطر على الامن القومي”

  1. mfs
    23/07/2013 at 11:40

    انتو ليكو عين تتكلموا على قناة الجزيره وعندكوا كل قنوات الفتنه والتحريض دول هم سبب الهبل اللى احنا فيه وهم اول من ابتدعوا الكذب والتضليل وفضايحهم كتير اوى ع اليوتيوب ومش بس كده ورايحين تقفلوا القنوات المؤيده لمرسى يا سلام ع الديمقراطيه العبيطه بتاعتكم ولا التعتيم الاعلامى الجبان اللى اتسبب فى موت الكتير من المصريين ف ثورة 25 يناير ونفس الشئ بيعملوه من المعتصمين المؤيدين لمرسى فى النهضه ورمسيس ومطروح والحرس واللى كان السبب فى كتير من القتلى المصريين لكن نقول على كاتب المقال ده ايه غير انه غير واقعى ومغيب وجاهل وانحيازى بشكل اعمى ولا يقول غير الباطل وحسبى الله فيه وف كل اعلامى لا يظهر الحقيقه ولا يقول الحق

  2. memo
    21/07/2013 at 11:44

    الاخ اللى بيقول هذا الكلام مش يفكر الاول ليه تم غلق القنوات وليه التعتيم الاعلامى على مؤيدى مرسى وليه الاعتقالات من غير اسباب ولا محاكمات وهل مش هى دى قناه الجزيره التى كنتم تمدحون فيها ايام ثوره 25 يناير وتقولو هى القناه الوحيده التى تنقل الحقيقه ايه انتم بتنسو وبتتغيرو بسرعه ليه نفسى تشغلو تفكيركم بجد هى دى الحريه اللى كنتم تطالبون بها غلق القنوات والاعتقالات ونفسى تفكر وتقول ليه بيتم التعتيم الاعلامى على مؤيدى مرسى فى جميع المحافظات علرف ليه ولا لسه السيسي عامى نظركم وتفكيركم لو هو عبى حق ليه عامل التعتيم الاعلامى على المظاهرات فى جميع المحافظات وسلملى على الحريه والديمقراطيه

اترك تعليقاًً على هذا الرأي