من ساعة ما قامت الثورة
وقالوا عليها انقلاب
وأنا باسأل نفسي:
إيه الفرق بين الثورة والانقلاب؟
اللي لفت نظري أكتر إن فيه لغات زي الفارسية والأذربيجانية الكلمتين بمعنى واحد، حتى بيتنطقول بالعربي inqelab
الثورة شعبية، والانقلاب عسكري
مش مقنع بالنسبة لي
ما هو القوة العسكرية لو ما انحازتش للشعب، عمرها ما هتتحقق
وإلا هتحصل ازاي يعني؟
وبعدين لو الملايين اللي وقعت تمرد، وعشرات الملايين اللي نزلوا الشارع مش كفاية إنك تعتبرها شعبية، إمتى تعتبرها شعبية.
الثورة ضد حاكم غير شرعي، والانقلاب ضد الشرعية؟
ما تدخلش النافوخ
كل الرؤساء والحكام بيقولوا على نفسهم شرعيين، إحنا اللي قلنا إن مبارك رئيس بالتزوير، إنما (رسميا) هو رئيس منتخب بالصندوق، وبشكل في منتهى الديمقراطي، وبالتالي لما تقول لي إن مرسي أول رئيس مدني منتخب، أقول لك: يدوم، ماليش فيه، الدكتور مانعني من أكل الأونطة. أول رئيس مدني منتخب لسه مجاش.
الشرعية أكبر بكتير من انتخابات تخوضها بدون أي ضمانات لتكافؤ الفرص، وبتهديد الأقباط في الصعيد من النزول، وبتزوير المطابع الأميرية، وتهديدات بحرق البلد، وتيجي تقول لي منتخب.
الثورة بتحظى بتأييد دولى، والانقلاب محدش بيعترف بيه؟
كويس، تعالالي
العالم يا صديقي لا يتحرك وفقا للشرعية، ولما بيحب يسمي أي حاجة ثورة، بيسميها، ولما بيحب يسمي أي حاجة انقلاب بيسميها.
والدول الكبرى بتتدخل فقط وفقا لمصالحها، وكتير جدا موقفها بيبقى مايع ما تفهملوش، والجملة الأشهر: ندعو جميع الأطراف لصراع ونبذ العنف، رغم إنهم عادة هم اللي بيسلحوا جميع الأطراف، فكك من الحوار ده.
إيه الفرق بين الثورة والانقلاب؟
الواقع مفيش فرق غير إن الثورة حاجة كويسة والانقلاب حاجة وحشة
علشان كده ما يحدث في مصر هو ثورة
لأنه بصراحة مفيش حاجة أحسن من الإطاحة بالإخوان.
إت از نوت أ ميليتري كو. إت از أ ريفوليوشن.
