ممكن شوية أسئلة لحد عنده عقل
1- هل جملة (الشعب يريد )شعار الثوار شرعي؟ هل الثوار معبرون حقيقة عن الشعب حتى تنفذ مطالبهم ؟
2- هل الاعلام يعطي مساحات متساوية للثوار ومعارضيهم؟ وللا بيصوروا البلد كلها مؤيدة للثورة ؟
3-لو انت بيتك واحد بناه بالغش وكان على وشك الانهيار وخرجت انت وعيالك للبرد والكلاب المسعورة والبلطجية والحرامية وكل اللي معاك ضاع أو على وشك الضياع …تفتكر أول حاجة ممكن تعملها ايه ؟ تسيب العيال في الشارع وتروح تدور على اللي بني البيت عشان تحاكمه؟ وللاترمم البيت الاول عشان تامن العيال ؟ تسيب العيال تموت من الجوع وتفكر في النظام اللي هيحكم البيت ومش مهم العيال؟
4- لما يبقى لك مظلوم منتظر حكم يبرؤه وهو محبوس احتياطيا وفجأة تقرا خبر من مجلس القضاء بتفريغ جميع الدوائر القضائية من القضايا حتى يستطيعوا البت في قضايا الفساد ايه رايك ؟ هتقول اه ايه يعني يستحمل الحبس عشان خاطر مصر ؟ تفتكر من حقك تاخد القرار ده وبعد ما يخرج ان شاء الله هتقدر تواجهه بقرارك؟ 5- لما الشعب يقول كلمته في موضوع الدستور ينفع تسفه رأيه وتطالب بإلغاء قراره وفي الاخر تقول انك واخد توكيل غير مرئي ولا مسموع ولامحسوس من هذا الشعب بانك تتكلم بلسانه ..هل هذا يعقل؟اكاد اجزم ان غالبية الشعب مش عاوزة ثورة ولا مظاهرات بس مين اللي غلطان؟ هل الشعب هو اللي غلطان مش عاجبه ومكسل أو مش عارف يقول مش عاجبني ويوم ما يعبر يكتفي بالمصمصة ؟ وللا المجلس العسكري اللي مش شايف في مصر الا التحرير والباقي هواء ينفذ قراراتهم ويقول لهم شبيك لبيك كل ما يروحوا يقفوا هناك ؟وللا بتوع التحرير هم اللي غلطوا لما اختاروا حكومة شرف اللي مش بتحل ولا بتربط ودلوقتي قالبين عليه زي ما قلبواعلى اللي قبله رغم انف الجميع ؟ وللا الاعلام المتربي على الكذب من ايام النكسة اللي بيغير في الحقايق وانكشف كذبه في نتيجة الاستفتاء لما بين ان الشعب كله عاوز يقول لا ويمنعني ويمنعك من ان تقول راي مخالف لما يريدون؟………. لك الله يا مصر
يا اخوانى الفكرة مش كدة خالص
أولاً/ مطالب الثوار مشروعة
ثانياً/ أى رأى لا يعبر عن مطالب الشعب لا يمكن ان نحشد له ولو مائة الف مش مليون كما راينا يوم الجمعة الماضى ، بدليل ان “المخلوع ” لم يستطع ان يحشد الفا واحدا من مؤيديه
ثالثا/ الثوار مش بس فى التحرير ، وانما فى كل ميادين مصر
رابعاً/ انا كنت فى التحرير يوم الجمعة ، وبجد ياجماعة القعدة هناك متعبة جدا والحر شديد وإذا لم تكن صاحب رسالة وهدف شريف تسعى اليه فلن تترك منزلك وتكلف نفسك مشقة الذهاب الى هناك
والله ياأخ منير أنا معال فى كل كلمة ذكرتها ولكن المشكلة إن الصوت العالى فقط هو المسموع
وليس صوت الحق والضمير.
يا ريت فعلا الاسئلة دى يقراها كل بتوع التحرير والمسئولين الحاليين عن البلد وزيادة عليهم يا ترى الناس اللى فى التحرير النهاردة وامبارح وكل يوم هم دول نفسهم اصحاب الثورة بجد الناس اللى وصلونا للحريه بالتاكيد لا لان اللى يبنى لا يسعى ابدا للهدم
ازهو الناس اللى واقفة في الميدان بتفكر ازاى
والله انا مع الثورة صحيح بس مش مع احياء البلطجية من جديد
صدقني أنا رأيي من رأيك بنسبة 100% في كل اللي إنتا قلته ، ولكن كلامي ده مش عاجب حد .