أصحاب المشروع الإسلامي فعلاً حاسين بظلم بين. ومشاعرهم منطقية لو شرحنا الموضوع من خلال مصطلحات زي ديمقراطية-أحزاب-شرعية-دولة-الخ.
لكن هم مايعرفوش أن المصطلحات دي جت من حتة تانية خالص، ولو اعتبرنا مشروع الخلافة الاسلامية كمبيوتر فهو بيطلع إيرور عند إدخال أي من هذه الكلمات. مش بيقراها، عشان أحدث نسخة برنامج تشغيل على كمبيوتر الخلافة عمرها اكثر من ألف سنة، بينما أقدم نسخة برنامج تشغيل بيقرا الكلمات دي عمره حوالي ٦٠٠ سنة.
والسبب الوحيد أن الإسلاميين قادرين يستعملوا الكلمات دي من غير ما حد يزعلهم جامد، هو أن فيه واد أهبل قاعد جنبهم في اللجنة وبيغششهم، و هم بينقشوا وراه الإجابات النموذجية.
لكن حقيقة الأمر أن الحرب/الحوار الدائر بين الإسلاميين والمجتمع هو في الحقيقة حوار طرشان. الأخوان ماعملوش حاجة غلط (من أدبياتهم) أثناء الحكم، بس ماحدش راضي يقول السبب الحقيقي أنهم ما ينفعش يبقوا في الحكم. وكل الناس عمالة تقول لهم أسباب غير حقيقية، بالظبط زي العيل الصغير لما يسأل أبوه وأمه أنا جيت إزاي و هم مش عايزين يواجهوا فبيفضلوا يشتغلوه.
