رقص المصريات قدام اللجان دلالته عندي مش مجرد بهجة ولا فرحة. ممكن جداً تبقي سعيد ومبسوط ومش قادر تعبر عن فرحك أو إنبساطك..
رقص البنات والسيدات شعور بالأمان في المقام الأول. اللي بترقص عارفه إنها محمية، متأكده إن مفيش حد هيتعرض لها، حتي لو عايز. عارفه إن الجيش والشرطة موجودين، وشايفه بعنيها ناس حواليها علي نفس الأرضية. الناس نفسها محاوطينها وهي بترقص وبيرقصوا معاها.
ومن الناحية التانية، ولأن مفيش حد تحرش بواحدة بترقص، دا دليل علي إن غياب الرادع أحد أكبر أسباب التحرش، ولا لبس ولا كلام فارغ.. المتحرش جبان، يخاف ما يختشيش، وطالما شايف الشرطة والجيش قدامه مش هيقدر يتحرش.
وإعتقادي إن السبب ده هو أكبر أسباب إقبال السيدات والبنات علي التصويت. هما أكتر فئة تآذت من غياب الأمن وعدم الشعور بالأمان.
أيوة الأمن قبل الحرية، يا أبو شعارات جوفاء !!
