مش فاهم إيه الفكرة إن بعد الاستفتا اللي كان بيوضح حاجات كتير إن ناس تقرر تنزل تتحدى مجمل الوضع، شاملا مئات الآلاف اللي اتظاهروا ف ميادين كتير بهدف تحدي الإخوان واللي يتشدد لهم وتأكيد إيمانهم بالسيسي.
إيه الفكرة ف التحدي دا وبهدف إيه؟ بالنسبة للإخوان التحدي مفهوم.. دول طايفة وبتدافع عن كونها طايفة منصورة بوعد إلهي، ومتربية على كدا، وعندهم مشروع خيالي هو جوهر إيديولوجيتهم اسمه “أستاذية العالم”.. وخسائرهم تحتسب في ميزان الطايفة استثمارات للمستقبل وأساطير تضاف إلى أساطير سابقة وإلى أسطورة مؤسِّسة. وتحدي الناس بالنسبة لهم ملوش أهمية، بل بالعكس، لأن اللي مش معاهم واللي ضدهم مش ناس أساسا.. أو كما قالوا “مش حنعيش عبيد علشانكو/ حنحرركو غصبن عنكو”. يعني يا بقر يا بهايم إحنا بوصفنا أسياد العالم (مستقبلا) مينفعش نعيش عبيد. ولو عليكو انتو ف ستين داهية.. لكن حنحرر أبوكو بالغصب عشان دا مهم لفصيلتنا الخروفية المتفوقة في أكل البرسيم.
لكن الثوار من أجل الديمقراطية نازلين يتحدوا الناس ليه؟ بدل ما يدوروا على أي نقطة التقاء مع الناس يبتدوا منها، كما يجدر بـ”ديمقراطي”، مش “أرستقراطي”؟ هل عشان يثبتوا حقهم ف التظاهر؟ عشان يقولوا إحنا كل دا ميهمناش أساسا؟ يعني عشان عايزين يبقو هما كمان طايفة تمتلك الحقيقة؟
عايزين هما كمان يقولوا الثورة ثورتنا، ومحدش ياخدها مننا؟ إحنا اللي بنفهم؟ إحنا التقدم؟ إحنا الحرية وانتو لأ؟ طب إمتى بقى بعون المولى سبحانه وتعالى حيوصلوا لمرحلة “حنحرركو غصبن عنكو” عشان دا من شروط حريتنا يا كلاااااااب؟
ااااة