كانوا دايما بيصورلنا في الافلام اللي اتعملت بعد ٢٣ يونيو ان محدش كان بيدخل الحربية الا لو كان معاه كارت توصية من باشا من البشوات او ليه واسطة تعرف حد في الديوان الملكي و علطول كنت بفتكر منظر الراجل اللي كان بيطلع في الافلام دي بيقدم في الحربية و يسألوه بلهجة خواجاتي “عربي مكسر” مين وسطتك فيرد عليهم و يقولوهم بكل ثفة انا وسطتي ربنا و بعدها يسألوه ابوك بيشتغل اية يقولوهم فلا بسيط فيبصوله شزرا و يقولوله بتهكم ابن فلاح و عايز تكون ظابط في الجيش ؟!!!
كنت اقعد افكر .. مصر حكمها ٤ رؤوساء عسكريين منهم ٣ نعرف وظائف ابائهم
١- جمال عبد الناصر ابوه كان بسطجي “مع كامل احترامي للبسطاجية”
٢- انور السادات : ابوه كان فلاح أمي بختم من المنوفية.
٣- حسني مبارك : برضو ابوه كان فلاح امي من المنوفية “مع كامل احترامي لمهنة الفلاحة على راسي من فوق”
طيب لما ناصر و السادات و مبارك ابهاتهم كانو بسطجية و فلاحين يبقى بأمارة اية يصورلنا في الافلام بتاعت الخمسينات و الستينات ان اللي اهليهم شغلتهم مش اد كدة مكنوش بيدخلوا الجيش و كان لازم وسطة من باشا او يوران او حد من الديوان الملكي ؟!!
السؤال التاني اللي كنت بسأله لنفسي هو ممكن واحد ابوه بسطجي او فلاح امي يدخل الحربية دلوقتي ؟!!
الحقيقة ان كمية الكذب اللي اتكذبت على المصريين في اخر ٦١ سنة تكفي كوكب الكرة الارضية من مخزون الكذب يجي عشرة خماشر تماشر مرة
لقد هرمنا كذبا و تزوير للتاريخ
