تقسيم أدوار هايل!!! البلتاجي وقيادات الإخوان يحركوا شبابهم الغلابة، لكن المسلحين، عشان يدخلوا في مواجهات.. قدروا يكسروا الشرطة.. يبقي عظيم.. بقي فيه نصر معنوي. انهزموا وبالتالي إتقتلوا.. برضوه عظيم.. ساعتها بيبتدي السناريو التاني: صويت علي دولة الإنقلاب العسكري اللي بتدبحنا. وكلات الأنباء الأجنبية تتكلم عن الجيش اللي بيدبح الرايح والجاي في مصر. وصحاب البلتاجي من ساعة الـ ١٨ يوم، زائد شوية حقوقيين متنكرين في زي “إنساني”، زائد محترفي المطالبة بلجان تقصي الحقائق، زائد دلاديل الإخوان سياسيا.. يبتدوا الصوات الداخلي ضد الدولة الفاشية اللي هتدبح الناس لما تخلص علي الإخوان!! المهم أن في وسط الزحمة محدش هيسأل “الرصاص اتضرب منين؟”، “مين اللي ضربه الأول؟”، “الإخوان جايبين السلاح منين؟، “هو ده نفس السلاح اللي إتقتل بيه الشباب عند الاتحادية؟، “أيه المعلومات اللي عندك عشان تتكلم؟”، “أيه التضارب ده؟؟؟ مش بتقولوا ١٢٠ شهيد؟ إزاي بقوا ٢٩؟”.. يا عم طنش.. هو حد مركز.. المهم الزيطة، المهم أن نوع الفاشية اللي بحبه يستمر من غير ما أسميه فاشية.. وتفضل تحت قيادة اللي زقوا الشباب عشان يموتوا.. صاحبي وحبيبي البلتاجي اللي بيتباهي بعمليات سيناء!!! يا عم طنش المهم الزيطة، ويا حبذا لو فيه مصلحة.. أو مهلبية. سواء مهلبية دولية أو إخوانية. بالمناسبة، سؤال بارد: لو الدولة فاشية والإخوان فاشية.. أيه أحسنلي؟ أناضل ضد فاشية واحدة؟ ولا أناضل ضد فاشيتين؟
