طيّب نسبق الأحداث شوية
هي مش هانسبق و لا حاجة .. هي على قديمه قوي .. بس أنا عارف ناس عاملة مش واخده بالها
المهم
دلوقتي مشكلة السنتين اللي فاتوا كانت بسبب الإخوان بس ؟
هل الإخوان لوحدهم همّا اللي عملوا حشد باسم الدين عشان استفتاء 19 مارس و قالوا الدين بيقول نعم ؟
هل الإخوان لوحدهم عملوا مليونية تأييد المجلس العسكري و تنصيب المشير أميراً للمسلمين ؟
هل الإخوان لوحدهم زرعوا الفتنة في صفوف المصريين و هدّدوا الشارع و بلطجوا عليه و اتّهموا كل الناس غيرهم بإنهم فوضويين و عايزين يهدّوا مؤسسات البلد ؟
هل الإخوان لوحدهم عملوا دعايتهم الإنتخابية على أساس ديني و اتهموا المرشحين الآخرين بالفساد و الكفر ؟
هل الإخوان لوحدهم بلطجوا على مجلس الشعب و أقصوا كل الأطراف التانية و استحوذوا لوحدهم على الحكومة ؟
هل الإخوان لوحدهم مارسوا دور الطرف التالت في كل مظاهرات المصريين في فترة المجلس العسكري و أحداث بورسعيد و غيرها ؟
هل الإخوان لوحدهم بلطجوا في انتخابات الرئاسة و استخدموا لغة الدين في تصفية المرشحين الآخرين معنوياً و شعبياً ؟
هل الإخوان لوحدهم استخدموا منابرهم الإعلامية في رمي المجتمع كله بالكفر و الدعارة و الفلولية ؟
هل الإخوان لوحدهم كذبوا و دلّسوا و عرّصوا لأمريكا و اسرائيل ؟
هل الإخوان لوحدهم بلطجوا على لجنة صياغة الدستور و لفّقوا دستور بيخدم مصالحهم بعد إقصاء الجميع .. حتى الكنيسة خلّوا محمد الصاوي يبقى ممثل عنها ؟
هل الإخوان لوحدهم بلطجوا على القضاء بإعلان دستوري محصّن لقرارات مرسي الرئاسية ؟
هل الإخوان لوحدهم عملوا كدا ؟
و الا كان ليهم شركاء ؟
مين ينكر إن السلفيين ( ياسر برهامي – محمد حسان – حسين يعقوب – نادر بكار … إلخ ) و الجماعة الإسلامية ( عاصم عبد الماجد – عبد المنعم الشحات … إلخ ) و التيار الوسطي القواد بقيادة أبو الفتوح و بعضوية أبو العلا ماضي و عصام سلطان و كل هاتيك الأشكال كانوا شركاء في جريمة اغتصاب إرادة الناس ؟
صحيح فيه ناس ما عملتش كل حاجة معاهم .. يعني كانوا يشاركوهم ف خطوة و يتراجعوا في خطوة تانية عشان ما يبانوش قوادين .. زي أبو الفتوح مثلاً .. لكن كلهم بلا استثناء كان عندهم نفس المشروع الفاشي المتعجرف الذي يظن نفسه مسلماً في مجتمع ناقص الإيمان
كلّهم بيشوفوا نفسهم أحسن من الناس و أكتر إيمان منهم و إنهم لازم يقودوا المجتمع لانتشاله من الظلمات إلى النور
كلّهم كانوا موافقين على سياسات الإخوان .. و على أقل تقدير كانوا بياخدوا موقف مايع لا قابل و لا رافض و سايبين البلد تروح ف الحتّة اللي ماحدّش عايزها !! 🙂
نقوم دلوقتي كلّ واحد فيهم هايعمل محترم و مالوش دعوة باللي حصل ؟
لأ عيب عليك منك له له له
و عيب على اي حد يقول لأ دول مش متورطين
حال إن كل حاجة و كل موقف متسجل و تصريحاتهم و فيديوهاتهم موجودة لحدّ دلوقتي ؟
و خللوا بالكم أنا مش باهاجم شخوص دلوقتي
يعني أبو الفتوح مجرّد نموذج هو و أمثاله
برهامي و محمد حسان مجرد نماذج هم و أشكالهم
لكن أنا باهاجم الجوهر الفكري اللي بيشتركوا فيه كلّهم
الجوهر الفكري اللي هوّ أساساً سبب كفر جماعة الإخوان و الإسلامجية بفكرة الديموقراطية
جوهرهم واحد إنهم كلهم جواهم فكرة متأصلة إنهم أحسن من الناس و المجتمع و إنهم معاهم نموذج الدين اللي المفروض الناس تتبعه
كلهم مفكرين نفسهم رسل و أنبيا للمجتمع دا .. على الأقل مفكرين نفسهم ورثة الأنبياء
كلّهم بيستخدم فكرة الشريعة الإسلامية و كلّهم بيلعب على وتر إن المصريين مش ماشيين على الشريعة و كلهم بيستخدم فكرته الدينية في أي خطاب سياسي
كلهم بؤر لتطرف قادم
و إن كان على الناس مسئولية دلوقتي .. فهي إنهم يكشفوا الأشكال دي على حقيقتها و يزيحوهم و يزيحوا أفكارهم من خانة القداسة
و افتكروا إنهم كانوا شركاء في الجريمة اللي اتعملت ف البلد دي
بس
