خـيبـة الأمــل راكـبـة جـمـل

خـيبة أمـل من تـُقـلها يصعـب يشيلها اليوم جـمـل , خـيبة أمـل فى عـام وفـات وفى ذكـرى تانية لثـورة كان بيها الأمـل , خـيبة أمـل فى حـال بلد كانت زمان والوقت كله فـيها كان , حاضرنا فـيها الكـل عـنده أكيد عـيون شايف وبيها خـيبة أمــل .
كان ياما كان , كان فيه حضارة عمرها كام ألف عام , كان فـيها ناس وبنوا الهرم نحتوا الجبال عـملوا معابد مِنها العالم إنبهـر , كان فـيها مينا وقـتها , مينا إللى جَـمع شملها , ودا كـله كان .
أمـن وأمـان … وتأكدة آيات كمان ومن الكتاب , فيها طـوى الوادى المُـقـدس , فـيها الجبل إللى وفيه كان الكلام من ربنا للنبى موسى عـليه ومِـنا السلام , والربوة فيها أوى عـيسى والأم مريم مِـننا ليهم سلام , والكـل كان .
زارها الخليل مع زوجته سارة وكان وله فيها نسب بزواجه هاجر أم إسماعـيل أجداد نبينا المصطفى صلوات عـليهم مِننا وكمان سلام , يعـقوب كمان وأولاد وليه كانوا أنبياء , عـلى أرضها عاشوا السنين , يوسف كمان فـيها سكن وكمان حـكم , موسى وهارون الأنبياء عـلى أرضها كان الميلاد , يوشع ابن نون فيها إتولد وفيها عاش , والخضر كان , أيوب واشعـيا وارمـيا , ليهم جميعاً مِـننا أفـضل سلام , والـكـل كـان .
كان فـيها عـبد الناصر لسه فاكـر يـوم ما مات وبلد بكامـل شعـبها خرجت تقـول له الوداع , كان سـد عالى وإتبنى بإيدين رجـال .
كان فـيه سادات والجـيش معـاه , جابوا الكرامة لما ضاعـت بالشهامة , كان شعـب صابر فيها إتحمل كـتير , عـلشان فى يوم راسه تترفع بعـد السنين إللى عـاش فيها ذليـل .
كان فـيه كمان وخـدوا التـقيلة ومـش هـخاف من ردكـم , كان فيه مـبارك فـيها كان , تلاتين سـنه حَـكمنا فـيها حسيت وفـيهم بالأمـان , كان فـيه تعـب , كان فـيه شـَقى , كان فـيه لصوص عـاشـوا يمصـوا فى دمها , مش بـرضه ده إللى كان .
وكـان كمان زى النهاردة من عـامـيـن فـيه شعـب ثـار , خـرج وقـال , لا للفساد , للفقـر لا , للنهـب لا , تزوير كمان وفيها كان , وكله كان , ومشى النظام وخلاص رحـل , وكان كمان , قالوا حُـكم عـسكر طالبوا عـلشانه بـسقوط , و خـلاص بقى فى حُـكم كان .
خـيبة الأمـل راكـبة الجـمـل
بقى عـندنا خلاص رئيس , مؤمن وحافـظ للكتاب , ووراه جماعة قالوا عـنها مُـنظمة , خطابها كان , سُـنه وشـريعة , إسـلام يوحد صفها , إسلام وفيه الأمر شورى , خطابها كان , الظلم إحنا عـِشنا فيه , والعـدل جاى , وكتير وعـود .
خـيبة الأمـل راكـبة الجـمـل
فيه عـندنا ناس مُخلصين , دكتور برادعى وعمرو موسى وأبو الفتوح , حازم صلاح أبو إسماعـيل , صباحى , جورج إسحاق وكان وائل غـنيم , وفيه كفاية , و6 إبريل , فيه كتيير , عُـلماء أفـاضـل , وفيه كمان المُبدعـين , وشيوخ جوامع وكمان قساوسة بالكنايس , وفيه وفيه , إعلام بيدخـل كل بيت , فيه مسئولين والكل راع .
وفيه كمان , فـيه شعـب هيضيع وسطكـم , فـوضت فـيكـم ربنـا , ضـاع الأمـل ياسـراب عـنينا شايفـة ليه , فى يـوم وذكـرى بأحس فـيه بخيبة أمـل من تـُقـلها يصعـب يشيلها اليـوم جـمـل .

اقرأ ايضاً صفحات رأي متعلقة على جريدة احداث اليوم:

• العـقـل فـين !!!
• مصـر بتفـرح
• عـفـريت لكـل مواطـن
• ياخـيـر أمـة
• ألتراس مصراوى