كاريكاتـيـر

ودا إسمه إيه غـير كاريكاتير , إللى بشوفه فى البلد دا يبقى إيه غـير كاريكاتير , على مصر بلدى الكاريكاتير , ببلاش هنا الفـُرجة تكون , وعـندنا قـَرب وشوف الكاريكاتير , شوفوا معانا وإسمعوا وإضحكوا وإتريقوا , مـهوعـندنا الضحك ببلاش , أمـا المسارح إيه يكون لزومها إيه , حتى الـزعـيم عادل إمام هنشوفه ليه , وفلوسنا ندفع ليه وليه , أصل البلد صبحت خلاص مليانه زعماء يغلبوه فى الضحك يبقى نروح له ليه , وألا يكون ليه التعب ونشوف جُحا يحكم مدينته , فيه عـندنا منه الكتيـر , وكله لابس طراطير , طب يبقى ليه نتعـب فى روحنا ياسميـر ياغـانم ونتفرج عليك , طب قوللى ليه .
كاريكاتير , أستاذى شيخى بيـرسمه , وفى خطبه للجمعة كلام يتكلمه تشبيه غـريب وبيوحى بيه , وعـن نبينا المصطفى يشرح يقـول عالمكـر بيـه , وإيه إرادة ربنا كانت وليه , صلوا عليه , شيخى يا أستاذى الجليل , فـرق وكبير بيـن إللى إنت بتقصده ونبينا المُرسل أكـيد فـرق وكـبيـر, شيخى الجليل كان منى ليك كل إحترام لما السياسة كانت بعيدة عـن الكلام , شيخى الجليل الوقـت ليك منى الوداع قـبل ماييجى اليوم وأقطع خطبتك ويكون ومنى ليك كلام , وأكيد فى يومها يضيع مابينا الإحتـرام , شيخى … سلام .
كاريكاتير , والمستشارين يرسمـوه , إعلان ودستورى يـعلنوا الجهـل بيه , هأ هأ , هأموت م الضحك , بس قولوا لـزومكوا إيه .
كاريكاتير , الشرطة ملهـاش دعـوة بيه , إنطق وقوللى بسرعة مين إداك فلوس , إنطق وقول , تتبع لمين , أصل إللى جوه القصر إعـترفوا عـليك , إنطق وقول , ووشوش ومنفـوخه من الضرب عـشان وبيه ييجى إعـتراف , طب أمـن دولة لزومه إيـه , راحـت عـليـه .
كاريكاتير , فى مـدينة الإعـلام كمان بنـشـوف وليه , دبـح لجمـال , دبـح لعجـول , دورات مـياة وبـتتعمـل , ودا حـق مشروع للجميع , الإعتصام سلمى ومـفيـش تعـدى للأصـول .
كاريكاتير , الشرطه إللى بتـرسمة , إلحـق وشـوف وفى قـسم الـدقى خلاص راح الـوزير , عـلشان يـرتب للـدفاع وقـت الهجـوم , أصل الهجوم من حازمـون , فـلنحتـرس , فالحازمون قـادمون .
كاريكاتير , دستـور بلـدنا خلاص قـسمنا لفـرقـتيـن , دستور هـتمشى عـليه بلـد , إزاى يكون بالـشكـل ده , وليه يكون , دستور هـيقـسـم الـبلـد ملهـوش لـزوم .
كاريكاتير , إعلام ومليان مأجورين والخونه فيه مترصصين , مش دا الكلام , أما الـقضاء بـقى ليه عـداء , والثورة بيها ناس كتير , أسماء وكانوا للرياسة مـُرشحين , الكل مطلوب له سكوت , مطلوب عَمى , مطلوب طـَرش , مطلوب له مـوت , ومثل زمان كـنت أسمعـه , الوقـت أنا شـايـف ولـيه , مهـو إللى إيـدة بتـزرعـك أول متعمـل بعـد زرعـك تـقـلعه , ترميـه بعـيـد .
كاريكاتير , والضحك فـيه يقـلب بُـكا على حال بلـد صبحت خلاص من غـير كبير , وحالنا فـيها عالمشاع , من غـير كبير , أصل الكبيـر دا إللى يجَمع من حواليه الكتيـر , من غـير كبيـر صبحت بلـد والهـيبة راحـت والسبب حـواليـن كبيـرنـا ميت كبيـر , وآدى النتيجـة … كاريكاتير .

اقرأ ايضاً صفحات رأي متعلقة على جريدة احداث اليوم:

• العـقـل فـين !!!
• مصـر بتفـرح
• عـفـريت لكـل مواطـن
• ياخـيـر أمـة
• ألتراس مصراوى