مـولـد بـلا صـاحـب

قالوا الغرض م الصيام فيه نبقى م الصابرين , على جـوع كمان أو عـطش دا فى عـز صـيـف جاييـن , إرحمنا وبرحمتك يا أرحم الراحميـن , إجعـلنا نصبـر نكـون عـباد وليـك صالحيـن , إجعـلنـا نصبـر يارب على يـوم وفيـه عايشيـن , حاسيـن بفوضى وتخلف وبجهـل فى كل شىء , أحوال كانت سيئة الوقت ليه أسـوأ , إنتشـرت البلطجة وخلاص مفيش أخلاق , والصبر فيها خلاص معـدش لينا صاحب , الميكروباص نركبه والأجـرة فيه ع الكيف , وإللى يفكـر يعارض دا يترمى عالرصيف , ولو صبرنا ودفعـنا رجلينا توجعـنا من قرفصه بين كراسى حاشرين وفيها روحنا , ولما ييجى الفرج وهننزل المترو نشوف سلالمه كمان ناس قاعـده ليها مـلـكوا , فيها التسـول يكون على كل شكـل ولـون , والبياعـيـن فارشيـن وفى طـُرقـه مترصصين , أما إحنا أهو صف واحد ورا بعضنا ماشيـن , ولما نركب يابخته دا إللى فيه يـُـقعـد , حِجره قوام يتملى عسليه أونعناع – وغيرها مناديل ورق – نشـف يابيه العرق – من بياعـيـن وبغلاسه عماله فيه تحـدف , أما الشوارع خلاص حالها يسـد النفـس معـدش فيها رصيف نمشى عليه ونمـد , وتاتا تاتا بنحبى وعنينا تتفـرج على سيارات حالها حالنا واقفـه ماتتحـرك , أما السبب دا تلاقيه تـكـتـوك واقـف عـطلان أو غيـره بيسـد شارع صاحبه خلاص حَرنان قدام تِـرلة كبيـرة وقـف أهـو وعَـرض , شـوارعـنا مسـرح كبيـر والعرض فيه مستمـر , تلاقى فيه الدراما فيها دى توصف حـال توصل لحد البـُكا على ماعليه قـد آل , أكشن ولغـة الكلام فيه دى مش باللسان دى بالسنج والمطاوى , آسف دى كانت زمان , الوقت فيه الطبنجه وفيه كمان آلى , ولما أشوفه أقـول ياعـم وأنا مالى , أنـفـد بجلـدى قوام لمراتى وعيالى , أما الكوميديا تلاقيها على روحنا فيها الضحك , مهـو قالوا شـر البليـة أكيـد يجـيـب الضحـك .
دايمـاً يارب رحيـم وبالعـباد عالـم , وفى الصيام شياطين بالأمر متسلسلين , ولجوعـنا أو للعـطـش نقـدر نكون صابريـن , لكنه من إنسنا شياطيـن كتير مطلـوقيـن ومش هنقـدر معاهم نكـون من الصابريـن , يارب منـك مـدد , يارب منـك عـون , يكمل وبيه صبـرنا نقـدر نتم الصـوم , مهـو أصـل حال البلـد خلاص بقى سايـب , ويـومنا بنعيـش فيه مولـد بلا صاحب .

اقرأ ايضاً صفحات رأي متعلقة على جريدة احداث اليوم:

• العـقـل فـين !!!
• مصـر بتفـرح
• عـفـريت لكـل مواطـن
• ياخـيـر أمـة
• ألتراس مصراوى