واحد سألنى وقال لى إنت زعلان ليه , رديت عليه قلت له طب قوللى أفرح ليه , رد عليا وقال الهم باين عليك مع إن طول عمرنا الضحك بيكون بيك , أنا قلت دا كان زمان وزمان خلاص وَلـّىَ , وإللى بيحصل قصادى دا غضب من المولى , واحد وفى التحرير الكل سامع ليه , يا النصر أو الشهادة وكفـن كمان فى إيديه , والتانى قال مجزرة هتكون وبأدينا , مش كل مرة كده هيضحكوا علينا , وفى ناحية تانية السادات فى قبرة مستغرب وجندى مجهول معاه قاعد بيتفرج , الناس كتيره ليه , هوا إحنا فى شهر إيه , شهداء وكان دمهم تمنه ياناس غالى , كان عار كبير وإتغـسل , دا مهرها غالى , أما النهاردة العـروسة الدمع فى عنيها , والأهل والخلان خايفين أهو عليها , ليلة فرحها ياناس الكل ليه حزنان , الكل خايف ليه , الفرح ليه بهتان , الفرح مالـُهش لون , طب حتى فين الغناوى , زغاريتنا راحت فين , الغل ليه والغباوه شايفها ماليه الوشوش , أهل الفرح فرقتين والقصة معروفة , إخوات لبعض وأسامى صبحت قابيل وهابيل , وفى النهاية الغـراب يحفر ويدفـن أخوه , والدرس بيكون لبنى آدم بالعـقـل إتكرم , لكنه العقل فين ضحكوا عليه , سلبـوه , ملعون أبوها السياسة , ملعون أبو الكرسى , لو يوم يكون مهرها غراب بيدفـن أخوه .
انشاء الله خير