ثـــورة الصنــدوق

زى الكتير كنت قاعد ساكت وبأتفرج , عينى بتفحص تدقـق , مين جد مين هرج , وصدقونى الكلام كنت أوزنه بالجرام , عشان مفيش حد فيكم يزعل ويتعرض , واحد أنا منكم , عايش فى وسطيكم , كل إللى بيجرى عليا , بيجرى أهو لـيكم .
ثورة وقامت وكان فى الإتحاد قوة , وبعدها كان تفرق أنانيه وبقوة , أهدافكوا راحت فين , عيون كتير عميت , على بعضكوا كالأسود والمصلحه غلبت , وشفنا نقض لعهود ورجوع كتير فى الكلام , أما الكلام بالدين بقى موضه وإنتشرت , إسلامنا بقى فيه فرق على كل شكل ولون , والصوره والكل شايف , ضرت وما نفعت .
الثورة قامت وكان يحكم بلدنا نظام , مَـلك وفيها كل شىء ومهمهوش أى شىء والناس خلاص قرفت , صبر الجمال صبرها وفى لحظه إنفجرت , إخوان وأهو الكل شايف نفس الطريق مشيت , كل إللى ييجى فى صالحهم عليه يقولوا آمين , وإللى يفكر يعارض يكون من الخارجين , وسياسه ليها شعار نفسى وبعدى الطوفان , للوطنى كانت زمان , الوقت للإخوان , ودا مش كلامى لوحدى , ملايين عليه شهدت .
أما الشباب إللى فشلوا يحققوا أى شىء , من بعد ثورة وبيهم , ملهُمش أهو أى شىء , الكل نفض وليهم , من بعد ماناس كتير على الكتاف طلعت , كل إللى قدروا عليه التريقه والنكات , والكركاتير يترسم , ألفاظ وفيها إنحطاط , شتيمه من كل لون وفى ناس عليه صبرت , يوصل فى بعض الأمور للولوله والنواح , وعمر الندابين مافى يوم يكونوا بناين , وبلد بترجع ورا , والناس خلاص قرفت , ناس فيها حالها إتوقف وناس كتير كسبت , أما البلد طظ فيها وخلاص مفيش إخلاص , كل إللى بأسمع وأشوف شعارات بصوت مسموع , لكنه كله كلام وعمره مايسد جوع , ملايين غلابه تشوفها ماليه القرى والنجوع , صابرين وآدى صبرهم زى زمان الحال , صابرين وبقى صبرهم خلاص دا صبر الجمال , كيلهم طفح والنتيجه الكل أهو شايف , ثورة جديدة وقامت , الثورة فى الصندوق .
إخوانا يامسلمين حبايبنا يامُنظمين , وفى السياسه بخبرة من السنين تمانين , الشعب أهو ثار عليكم , عمل عليكوا إنقلاب , م الشعب إختار شفيـق راسه براسكم وجاب , والوقت قامت قيامه , والصوت بقى عالى , والدعوة للإنقاذ والوحدة من تانى , بالذمة مش مكسوفين , لكلام وليه عايدين , وبعدها يتلحس ومنه متبرأين .
ياأهل بلدى الكرام , فيه عندى ليكوا كلام , نفس الكلام إللى قلته من قبل البرلمان , لازم توازن قوى والغلبه ما تكون لحد , بالعكس دا فى التعدد المصلحه للشعب , لازم توازن قوى وتكون عيون على بعض , معدش فيها أمان لازم نراقب بعض , البرلمان ليه عمل للأغلبيه إحترام , أما رئيس البلاد ميكونش منهم بجـد , لازم يكون من بعيد ويكونوا ليه النـد , زمان وكان فيه كلام إتقال ولمبارك , إزاى تكون الرئيس وتكون رئيس للحزب , والوقت نفس الكلام أقوله للإخوان , الوقت ليكوا القرار يا رئاسة يابرلمان , وياشعب مصر العظيم عايزنها خطوة لأمام , مش خلف در نعود , الغلبه ماتكون لحد , لازم توازن قوى وعيون تراقب بعض , ووقتها إللى يكسب هيكون أكيد الشعب .

اقرأ ايضاً صفحات رأي متعلقة على جريدة احداث اليوم:

• صـوتـى لـمـيـن !!!
• الشورى من الإسلام فلما يرفضه الإخوان ؟
• لا تـلـومـوهـم ولـومـوا أنـفـسـكـم
• الـشـعـب يـريـد بـنـاء الـبـلاد
• خـلـى الـدمـاغ صـاحـى