يا تري يا رئيس مصر ها تقدر تعمل لنا حاجة

فيه حاجات بتحصل في البلد بتقول وبتأكد إن اللي جاي مفيش فيه حاجة تخليك تكون مطمئن.. كل شيء بقي ممكن وجائز ومتوقع.. فالعمال بتعمل إضرابات واعتصامات في المصانع. وتحتجز أصحاب المصانع لغاية ما يمضوا ويوقعوا بالاستجابة لكل المطالب عمال علي بطال.. وبعد كده نقول عاوزين استثمارات وعاوزين اللي معاه فلوس يشغلها. ويخلق فرص عمل جديدة.. وفي كل مصلحة وفي كل وزارة. كل موظف بيعمل اللي عاوزه.. ييجي أو يروح. مفيش حد بيحاسب حد.. وإلا الموظفين وقفوا علي باب المصلحة وقالوا شيلوا المدير. ده راجل من الفلول وما بقاش ينفع مع الثورة..
والثورة اللي الناس فهمتها غلط. وصلت للداخلية كمان.. واللي حصل في مدينة 6 أكتوبر. مخيف وما يخليناش نطمئن علي حياتنا ولا سلامتنا. ولا إن فيه أمن هايحمينا. ولا حد ها يجاوب علي تليفون ويبعت قوة إنقاذ سريع.. وكل واحد يأمن نفسه بنفسه. ويشوف له حتة آلي سريع الطلقات يخبيها تحت السرير لوقت العوزة.. أهو يضرب كام رصاصة في الجو.. يمكن ينفعوه!!
وإيه اللي حصل بالضبط.. اللي حصل إن معسكر قوة حراسة المنشآت في مدينة 6 أكتوبر وقع فيه تمرد!!
وتمرد.. يعني فقدان الانضباط.. يعني عدم إطاعة للأوامر.. يعني عصيان.. يعني فوضي..
واللي قام بالتمرد حوالي 300 أمين شرطة ومجند رفضوا انهم يخرجوا يتسلموا الخدمات المكلفين بيها في حراسة البنوك والمصانع والمصالح الحكومية. وقفلوا باب المعسكر بالجنازير ومنعوا السيارات من الدخول.. وكمان منعوا قيادات الأمن تدخل تتفاهم معاهم!!
وكل ده ليه.. قال علشان الحوافز اتأخرت.. وما وصلتش وما اتصرفتش.. وازاي وازاي.. غيرهم يصرفها وهمه لأ؟!!
وتجيبهم شمال.. تجيبهم يمين.. يا جماعة عيب.. نفذوا الأوامر وبعدين اتظلموا. واحتجوا.. لكن لأ.. تقول لمين.. ده كان زمان يا سيدي.. احنا مضربين.. يعني مضربين..
والشرطة العسكرية وصلت.. ما هو دلوقت. كل حاجة بتحصل لازم الجيش يتصرف.. ويحلها.. وحاصروا المعسكر. والخوف كان من تصعيد الإضراب.. والعساكر جوه معاها سلاح آلي بكميات كبيرة.. والسلاح زي ما احنا عارفين شاطر.. وأشطر كمان من الشيطان نفسه!!
وطبعاً الحكاية انتهت بالتعهد بصرف الحوافز واللي انتم عاوزينه. بس كله يروح لشغله.. كفاية بقي..
واحنا كده وصلنا لمنطقة الخطر.. وخطر إيه.. دي منطقة الكوارث. وبحر الظلمات.. وسكة اللي يروح ما يرجعش!!
واستر يا اللي بتستر.. دا اللي جاي مالوش زي.. مادام الضباط والأمناء والعساكر عرفوا سكة السياسة وعملوا ائتلافات وبقوا بيطلعوا في التليفزيون ووسائل الإعلام ويقعدوا يناقشوا قياداتهم علناً.. ومش عاجبهم حاجة.. وكل اللي طالع في دماغهم إن فيه ناس بتقبض كتير.. وهمه لأ.. ناس قاعدة في مكاتب وبتاخد آلاف وهمه مرتباتهم بالملاليم!!
وكلامهم ممكن يكون صحيح. أو فعلاً صحيح. ومن حقهم يزعلوا.. ويطالبوا بالعدل والإنصاف.. لكن اللي مش صح أبداً. إنهم يرفضوا أداء الواجب.. إنهم يطلعوا الشارع يقطعوا الطريق. ويحتجوا زي ما حصل من عساكر معسكر الأمن المركزي علي طريق الإسماعيلية.. وزي ما عمل بتوع أكتوبر لما قفلوا باب المعسكر!!
فاللي عملوه مش من أخلاق الفرسان.. فرسان مصر اللي بيحمونا. واللي احنا بنقدر تضحياتهم.. واللي شرف الأمة كلها في رقبتهم. واللي همه أهلنا قبل ما يكونوا شرطة. وأمن وحكومة..
وإذا كانت الأمور هاتمشي كده.. يبقي أمناء الشرطة اللي اتفصلوا قبل كده لمخالفات عملوها عندهم حق يقفوا عند مجلس الشعب ويحتجزوا وزير في عربيته ويقولوا: لازم نعود.. وإلا هانولعها.. هانشعللها..
والمصيبة يا جماعة.. إن الأسلوب ده هوه اللي ماشي وهوه اللي بينفع.. وهوه اللي بيجيب نتيجة لأن الكل دلوقت بيطبطب ويهشك ويدلع.. وكله بيقول حاضر.. ونعم.. نعمين.. وكله بيخربها من غير ما يدري.. أو حتي يدري!!
ويا تري.. يا هل تري.. الأمور دي ها تنتهي بعد ما يكون عندنا رئيس ودولة بعد كام يوم.. ولا خلاص الناس عرفت سكة الشارع.. ومفيش حد هايقدر يقول لحد تلت التلاتة كام؟!.. يا تري هايبقي فيه نظام وعدل وقانون.. ولا البلطجة هاتبقي قانون ونظام؟!.. يا تري هانقول.. كلنا مع الرئيس القادم.. ولا هانقول: يسقط.. يسقط الرئيس؟!.. يا تري هايبقي فيه رئيس عنده سلطة وقدرة علي إصدار القرار.. ولا هانشوف رئيس خايف من البرلمان.. ومن الميدان؟!.. يا تري هاترجع مصر وتقوم صح.. ولا قدامنا كام سنة لغاية ما نفهم الديمقراطية.. ونتعلم؟!.. يا تري يا سيادة الرئيس هاتعمل فينا إيه؟!.. واحنا كمان هانعمل فيك إيه؟!!

اقرأ ايضاً صفحات رأي متعلقة على جريدة احداث اليوم:

• خَلْفَ النصب التذكارِىِّ للعقاد وطه حسين ومحمود مختار وزويل
• مصر الى اين وماذا تعطينا الدولة
• مصر تسير الى الافضل
• أوهام تجديد الخطاب الدينى
• ماذا بَعْدَ اسْتِئْصالِ الأُدَباءِ وَإغْلاقِ النَدَواتِ الأدَبيَّةِ يا مِصْرُ