اقول كلمتين فى اللى بيحصل فى العباسية، ومقدما باقول انى فقط باحاول افكر واشارككم التفكير:
الأول ناس كتير قالت – وانا منهم – ان ده اعتصام عبثى من البداية. هل الهدف من الاعتصام المادة 28 ولجنة انتخابات الرئاسة عشان حازم (اللى الأيام أثبتت ان الراجل ده فعلا مش محترم وما عندوش ريحة المسؤولية بس خلينا فى اللى ماتوا وخلينا فى البحث عن التصرف الصح للموقف ده) ولا اعتصام عشان يسقط حكم العسكر؟ ولو كده هل الاعتصام ده فعلا هيؤدى لسقوط حكم العسكر؟ طيب هل اللى بيخلينا نقول الاعتصام ده له لازمة ان حازمون يتعرفوا على الثورة أصلا وان المعركة مش معركة حازم بل هى معركة ضد الحكم العسكرى من الأساس؟
خلونا بقى نتفق على الآتى:
الصورة اللى قدامنا مشوشة ومرتبكة ومتخبطة ومضطربة تماما. وتماما يعنى تماما. سواء من فيسبوك وتويتر أو من الناس اللى نزلت الاعتصام بنفسها وحضرت مجزرة امبارح، واللى نزلوا فى أوقات مختلفة من بداية المعركة لحد النهاردة الضهر، ده اللى قدامنا:
كلام كتير تردد من ناس كتير مختلفة ان بعض المعتصمين كان معاهم فرد خرطوش وسلاح نارى، وناس تانية بتنفى، بس طبعا ما نقدرش ننفى الكلام ده تماما، حتى اللى نزلوا بنفسهم (خصوصا اننا عارفين كويس قوى ان بعض السلفيين بيتصرفوا بمنتهى الغباء وبلاش نضحك على بعض)، وكلام تانى بيتردد من أكتر من مصدر ان اللى هجموا ع الاعتصام منهم بلطجية (تبع الداخلية والدفاع طبعا) وبعضهم ناس عاديين من سكان العباسية كارهين الاعتصام (لعل بعضهم مواطنين شرفاء مخلصين بيتابعوا توفيق عكاشة بانتظام) وبعضهم بياعين سريحة واصحاب محلات شايفين الاعتصام ح يقطع عيشهم. زودوا بقى على التشوش الرهيب ده الكلام بتاع المعتصمين قفشوا رائد جيش، وانهم مسكوا بلطجى قعدوا يعذبوا فيه بالساعات، وطبعا مفيش حد يقدر يأكد أو ينفى
زودوا بقى أسوأ ما فى الموضوع: العدد فى الاعتصام قليل جدا، يعنى بالنهار لا يتجاوزون المئات، وفى المساء العدد لا يتجاوز الكام؟ خمسين؟ مية حتى؟؟ ده طبعا مخليهم فريسة سهلة لأى حد يدخل يفرمهم، سواء أكان بلطجيا برتبة ملازم أول أم مواطنا شريفا أم تاجرا مش فارقة معاه غير أكل عيشه فى منطقة الاعتصام. وطبعا السبب الرئيسى الأساسى فى قلة العدد ان أصلا سبب الاعتصام مش واضح تماما
وشكرا.. اللى له رأى يقول، بس بارجع اأكد انى باحاول افكر بصوت عالى ليس إلا
