هل يراجع المجلس العسكري جماعتة لتعود الى عصمته

بعد خروج جماعة الاخوات عن طاعة المجلس العسكري و مناطحته في كل كلمه يقولها , وبدأت تكون لها شخصية حتي يمكنها من الوقوف في وجه العسكر و يكون لها كلمه جوه البيت وبره البيت ,,,, حيث ان جماعة الاخوات في اول معرفتها بالعسكري اظهرت الحب والود و الهيام بالعسكر أيام فتره الخطوبه حتي يتم الايقاع بالخطيب اللقطه اللي معاه كل مفاتيح السلطان وممكن عن طريقه تحقق جماعة الاخوات كل احلامها في الظهور والوصول الى ان تكون السيده الأولي في بر المحروسه.
وفعلا احكمت جماعة الاخوات خطتها و رمت شباكها على العسكري حتي لا يفلت منها فهو بالنسبه لها فرصة عمرها… المهم عملت شغل الحنجل والمنجل وذهبت الى الشيخ كتكوت علشان يعملها عمل زي حجاب المحبه { سحر يجيب العسكر زاحف طلب لودها } المهم اقنعته بأنها عروسه لقطة و ستكون كالعجينه في ايديه و و انه سيكون سي السيد وهي الست امينه… وسرعان ما ظهر زيف الوعود البراقة بعد كتب الكتاب و تعلية الجواب ,,, وبدأت جماعة الاخوات كأي زوجه انتهازيه في التفكير في كيفيه احتواء الزوج اللي فاكر نفسه هيفضل طول عمره سي السيد وعامل فيها برم ,,
, لكن على مين يامعلم ,,,,, وحياة ده والا يكون على…….لانسيه اسمه و أخليه يسلم من أول زغره و يكون زي كل الازواج من عينة الريس حنفي { بتاع خلاص هتنزل المره دي لكن المره الجاييه لا ممكن ابدا} ,,, المهم من الاخر.. لازم تكون الكلمه كلمتها و الشورة شورتها ,,, و ان العسكري موجود فقط لتحقيق كل طلبتها و رغباتها والا يبقي ملوش لازمه و ممكن يكون في طريقه الى اكياس الزباله بعد تقطيعه حتت حتت!
ومن هنا بدأت جماعة الاخوات في ألعاب شيحه مع المجلس العسكري , يوم يرجع من الشغل ميالقهاش طبخة اصلها اتاخرت في جلسات النميمه بـمجلس الشعب…. يوم تاني راحت لامها {مرشدها الاعلي} وسابت البيت يضرب يقلب, و علشان تأخذ منهـا كل النصائح في كيفييه ترويض العسكر ,,, وكيف يمكنك ان تجعلي جوزك خاتم في اصبعك ,,,, يوم ثالث رايحة تدور وتبحث عن وزارة يمكن تلاقي فيها روحهـا و تنفث عن نفسها شويه ,,, يوم رابع رايحة تدور وتبحث عن منصب اعلي من منصب السيد العسكري علشان تبـقي اعلي منه وتزله شويه وتمارس عليه عقد النقص اللي عندها.
المهم جماعة الاخوات فضلت هاريه روحها عمال على بطال لكن مفيش حاجه أو صيده راضية تطلع في أيدها. وكل شوية تزن تزن على العسكري ,,, أشي طلبات وأشي انت قلت ولا عملت والا هببـت.. المهم تربي لة الخفيف ويفضل يلف حوالين نفسه علشان ما يفكرش في اللي بيحصله أو اللي هـيحصله! المهم العسكري زهق واحس انه انضحك عليه وهو اللي كان فاكر نفسه عنتر زمانه!
المهم بعد مده غير طويله بدا العسكري يكره جماعة الاخوات و بدا حتي يكره نفسه و العيشة واللي عايشينها ,,, وفي لحظة غضب اختل العسكري وفقد عقله.
و قام بطلاق جماعة الاخوات بالثلاثه ,,, حتي يستريح منها ومن شرها… لكن بعد الطلاق شعر بالندم الشديد,,, فماذا يفعل مجلس الشعب اللي هما كل اولاده منه,,,و وكيف يعيش من غير جماعة الاخوات لحظه واحده ,,, ويبدوا ان مفعول حجاب المحبه اللي عملته جماعة الاخوات للعسكر كان شديدا ومازال قويا أو ان العسكر اصبح زي القطط بيحب خناقه… المهم التجربه أثبتت للعسكر انه لا يمكنه العيش بدون جماعتة حتي ولو قطعته حتت ,, ويبدو ان مش كل اغاني الحب تكون دأما صحيحة,,,, فالهجر اهون من عذابي بقربك ولا اشوفش يوم اندم عليه و أنا جنبك…. ولم يفلح الشاعر في أقناع العسكر بان العيش بكرامه هو اكرم و افضل من العيش بجانب من تحب اللي مطلع عينك وروحك! وفيما يبدوا ان المجلس العسكري بدأ يراجع نفسه عملا بقول شاعر اخر ماكانش عنده دم ولا كرامه “عزه جمالك فين من غير ذليل يهواك ,, و لوعتي في هواك ” و ذهب يستشير المأذون الشرعي للجيش حول امكانية رد الجماعة لعصمته!
ولكن بعد ان حكي العسكر حكايته مع جماعة الاخوات ,, وقف المأذون مستنكرا موقف العسكر وذله و هوانه على جماعة الاخوات ,, وحاول اقناع العسكري بنيسيان جماعة الاخوات حفاظا على حياته و كرامته… لكن اصرار العسكري جعله يبحث عن مخرج للعاشق الولهان في حب جماعة الاخوات ,,,, ولكن مشكلة الطلاق بـالثلاثة هي الان مشكلة المشاكل….ويبدوا أن الوضع الشرعي والقانوني لا يمكن حله الا بواسطه المحلل ,,,أي لازم يلاقوا واحد امين عفيف يرضي ان يقوم بدور هذا المحلل,, وهل هترضي جماعة الاخوات ان تتزوج واحد تاني غير العسكري و يدخل بـيها شرعي حتي يمكنها ان تعود لعصمه العسكري تاني,,, وهل هيقبل العسكري ان يدخل احد غيره على طليقته و يدخل بـيها شرعي كمان , يانهار اسود ومنيل…مش ممكن ده يحصل ابدا وعلى جثته.. وهنا أمر العسكري المأذون الشرعي بان يعيد جماعة الاخوات الي عصمته ببدون محلل وحيث ان الدفاتر دفاترنا و المأذون مأذونا و الشهود شهودنا.. فلا داعي للدخول في كل هذه المهاترات و محلل وخلافه ,, وهنا اعترض المأذون مستنكرا على هذا الكلام الفارغ وقف ولي أمر جماعة الاخوات موجها كلامه الى المأذون ,, ياعم الشيخ…أطيعوا الله و أطيعوا الرسول و أولي الأمر منكم ” يقصد العسكر” ونظر مبتسما الى العسكر و جماعة الاخوات ,,, مبروك يا اولاد مش عايز اسمع أخبار وحشة عنكم ,, خلوا بالكم من بعض علشان بلدكم مستنيه الخير الذي نحمله لهم في جرابنا المليان بـثعابين وعصافير وحبال و الحنجل والمنجل ,,, ويجعله عامر

اقرأ ايضاً صفحات رأي متعلقة على جريدة احداث اليوم:

• خَلْفَ النصب التذكارِىِّ للعقاد وطه حسين ومحمود مختار وزويل
• مصر الى اين وماذا تعطينا الدولة
• مصر تسير الى الافضل
• أوهام تجديد الخطاب الدينى
• ماذا بَعْدَ اسْتِئْصالِ الأُدَباءِ وَإغْلاقِ النَدَواتِ الأدَبيَّةِ يا مِصْرُ