لو فكرنا شويه بعقل , من غير عصبية وتخوين , نسرح ونفكر بهدوء , كان الماضى , وآدى الحاضر , والمستقبل ليه رايحين , ثورة وقامت , فيها ناس نامت فيها ناس قامت , ثورة وجابت ثورة وشالت , ثورة وفيها كتير ناس تاهت , فيها ناس هربت فيها ناس خافت , فيها ناس تتكلم بحماس لكن مش فاهمه الأحداث , ناس وكلامها ياخد العقل ويحبه ملاين الناس , فيه ناس تانيه كارهين بعض .
وقالوا رئيس , طيب مين , ناس فيهم وكتير مُحترمه زى الشمس وفى السما ساطعة , فيه ناس تانيه كتير مُجتهدة وبتسعى على قد الحال , كل دى ناس والمهنة رئيس .
قالوا رئيس , طب مين فيهم وهنختار , فعلاً حيرة وفيها واقعين , لكن ولابد لتفكيرنا نعرف إحنا الأول فين , إحنا فى ثورة , يعنى إيه ثورة , حالنا دا حال بقى غير الحال , دنيا عليها جُـداد داخلين , والمتخبى فى الكواليس , فيه كتير لسه ليه جاهلين , كواليس جوه بلادنا كتير , غيرها فى بره كتير كواليس , إخوات لينا كتير حوالينا وعرب كواليسهم مليانه وكمان غرب وفى أمريكا كتير كواليس .
قالوا رئيس , وإحنا فى ثورة والحال إتبدل وإتغير , الأول للوطنى الغلبة , والوقت الغلبة لإخوان وسلف بقوا ليهم إخوان , فيه ناس تانيه ليهم رافضين , عملوا معارضه وأهو واقفين , وشباب ثورة تاهوا فى زحمة ناس وهدفهم فيه له خطه وخلاص فيها م الناجحين .
قالوا رئيس , وإحنا فى ثورة ومش فاهمين , إن الثورة ليها ضريبة عشان تغير , لازم نتعب , لازم نتحمل لمصاعب , نيجى على روحنا , مش بأدينا نهد المعبد على روسنا ولخراب رايحين , إحنا فى ثورة لكننا ليها جاهلين , العيب فينا العيب إننا نعرف نهدم لكن للبُنا مش عارفين ومش فاهمين , العيب فينا على حالنا مش م الصابرين , العيب فينا عايزين كله جديد فى جديد , عايزينه كده وفى غمضة عين .
قالوا رئيس , طب مين فيهم نختار , طب مين فاهم أهل الدار , مين يعرف كواليس الداخل , وجيرانا يعرف كواليسهم , وإللى بعيد من غرب وشرق وفى أمريكا إيه بـيـُدار , طب مين فيهم قولوا نختار , حاجه تحير , وإحنا فى ثورة ولازم كله جديد فى جديد , وإللى جديد طب يعرف إيه عن كواليسنا وبيه هيفيد .
قالوا رئيس , والعينة بينة قدامنا دا لو إختارنا لرجل دين , مجلس شعبنا ومعاه شورى , فيه كتير ليهم ناس باصين , برضه كمان فيه ناس رافضين , مش عايزين , مش كارهينهم , لأ والله , عايزين ناس ليهم وازنين , يعدلوا كفه ويبقوا وبيهم مش خايفين .
قالوا رئيس , وإحنا فى ثورة , ورئيسنا الجاى يكون حاله غير أمثاله فى ماضينا من قبل الثورة , ولازم هيكون واخد باله إنه رئيس جه بعد الثورة , والحال طبعاً غير الحال .
قالوا رئيس , طب لو قلنا خسارة ومكسب , إيه خسارتنا لما رئيسنا يكون م الماضى , إيه لو يحصل حتى إن كان له صله بالقصر , داخل خارج قاعد فيه , إيه خسارتنا لو كان يعرف دهاليزه , طب إيه مداخله وإيه سراديبه , وإللى فيه عاش يعرف ألاعيبه , يعرف أسرار عن كواليسه بره وجوه , وإللى بيحصل حوالين سوره , فى شرقه وغربه , شماله وجنوبه .
قالوا رئيس , إيه خسارتنا لو من الماضى , عارف فاهم إن الحال بقى غير الحال , لازم يثبت للى إختاره إن بيه مكسب , إن وجوده أحسن من غيره , وإن الماضى دَفعه تفيده وترفع رايته , وتفيد شعبه , إيه خسارتنا .
قالوا رئيس , طب فيها إيه لو كان م الماضى , م الماضى ويراقبه الحاضر , والماضى مايغيب عن عينه , شاف إيه ختامه , وقدام عينه , وكان بلسانه , كان بلسانه أيوه ختامه , طب فيها إيه لو ناخد منه أحلى مافيه , ولغلطه فى عيون راصدين , أصل الحال بقى غير الحال , إحنا فى ثورة , والشاطر فيها إللى يفكر مين هيفيد أكتر م التانى , مين بيه نكسب حتى إن كان جاى م الماضى .
طب مين فيهم , رأيى أنا وألا واحد فيهم , رغم قبولهم ورغم حضورهم , ورغم إن أنا مش كاره ليهم , بس دى بلدى وبعد الثورة أصل الحال بقى غير الحال , لازم نهضه فى أسرع وقت , وولاد بلدى مش صابرين , عايزين نهضه فى أسرع وقت , مش لسه بيهم هنجرب , مش شايف وألا واحد فيهم , لازم نكسب لو بالماضى , مكسبنا هيكون للوقت , مش لسه بيهم هنجرب , عايزين فاهم للكواليس , عايزين عالم بالكوابيس , عايزين واحد فيها إتدرب , مش لسه عالمهنة جديد , دى المهنة ياإخوانا رئيس , عايزين واحد كده فهمان , ولو إترشح أنا هأختاره , طبعاً يبقى عُـمـر سـلـيـمـان , دا لو فكرنا شويه بعقـل ومن غير عصبيه وتخوين .
أشرف صقر
احداث مصر
لـو فـكـرنـا شـويـه بعـقـل
اضيف بتاريخ: Sunday, March 18th, 2012 في 12:31
كلمات جريدة احداث: أشرف صقر, احداث, مصر
