خلاص يا ستات.. عصر الدلع راح.. ولا فيه قوانين هاتتفصل علشانكم.. ولا فيه فتاوي من بتوع إيناس الدغيدي. ولا حقوق مرأة وجمعيات نسائية من بتوع المجتمع المخملي..! دلوقت.. هراس جاي.. والشحات بتاع الدعوة السلفية واسمه الدكتور عبد المنعم الشحات والمتحدث باسم السلفيين كان بيهزر مع مذيعة في القناة الخامسة لتليفزيون الاسكندرية في وصلته هزار سلفي بعدما طلب منها تلبس الحجاب علشان يقبل يطلع معاها في حوار في التليفزيون وقالها إيه.. “البسي الحجاب دلوقت بمزاجك قبل ما تلبسيه غصب عنك”..!! والمذيعة إيمان الأشراف اللي ماكنش قدامها مفر تقول لأ.. لأن البرنامج كان علي الهواء.. قالت سمعاً وطاعة يا أمير.. شبيك لبيك.. هاتوا حجاب بسرعة.. هاتوا طرحة.. هاتوا أي حاجة. بس خلصونا..! والمذيعة ظهرت بطرحة زي اللي كانت بنازير بوتو بتلبسها.. أهو حاجة علي الراس والسلام..! والحكاية كده ابتدأت مش انتهت.. ودي البشري للي جاي.. وإذا كان السلفيون فرضوا الحجاب علي المذيعة وهي لسه مش في السلطة. أمال هايعملوا إيه فينا لما يوصلوا للسلطة..! وإحنا أولاً لازم نوضح إننا مش ضد السلفيين ولا ضد أي اتجاه إسلامي.. لأننا في الأصل سلفيون. كلنا بنمشي علي القرآن الكريم والسنة النبوية.. وكلنا بنحاول وبنشارك في الدعوة إلى سبيل ربك بالحكمة والموعظة الحسنة.. وكلنا أمة إسلام واحدة بتدعو للخير والرحمة والعدل والمساواة..! لكن إحنا بنقول وبنشدد إن إحنا مش عاوزينها دولة دينية. فالدولة الدينية هاتبقي علي الشكل القندهاري الأفغاني اللي راحوا فيه يدمروا التماثيل باعتبارها أصنام وحرام.. والدولة الدينية هايكون فيها المكانة والقيمة لأصحاب الذقون الطويلة والنقاب والجلاليب القصيرة. واللي هايتكلم ويعارض هيتهموه بالزندقة والكفر..! واخواننا من السلفيين اللي علي الساحة حالياً واللي طلعوا من تحت الأرض بعد الثورة. ليهم منطق غريب متناقض.. ومثير للسخرية كمان..! وتعالوا نشوف مثلاً الشيخ عاصم عبد الماجد المتحدث باسم الجماعة الإسلامية عمل إيه علشان يوافق يظهر في برنامج تليفزيوني مع هالة سرحان..! اشترط الشيخ عاصم إنه يتكلم معاها من وراء حجاب بناء علي شرطه في الظهور الإعلامي مع أي سيدة..! وجابوا حاجز بينه وبين الدكتورة هالة علشان مايشوفهاش ولا تشوفه ويتكلم براحته..! ولغاية كدة ماشي.. الراجل حر.. ويمكن هالة سرحان فتنة.. وصوتها عورة.. وأفضل شيء تبعد بعيد..! لكن الغريب والمثير.. إن كان فيه قدامه شاشة وكانت تعرض كل ما يدور وراء الحجاب مباشرة.. يعني هالة قدامه مباشرة وشايفها كأنها قاعدة معاه.. يعني مفيش فرق.. يعني الحكاية شكلية.. والعملية في النملية والفيل في المنديل.. ولسه ياما هانشوف.. ولسه ياما نتفرج..! ومش بعيد ان أي واحدة ماشية في الشارع دلوقت لابسة حجاب أو من غيره تلاقي وراها واحد بعصاية علي طريقة بتوع الأمر بالمعروف والنهي عن المنكر في السعودية يقول لها اختشي يا حرمة واحتشمي وإلبسي النقاب واقعدي في البيت واوعي تسوقي السيارة لوحدك تاني من غير محرم..! ولأنها الفوضي.. فوضى في كل شيء. واللي عاوز يعمل حاجة يعملها. فإحنا داخلين في نفق مظلم.. والفتنة جاية جاية.. وأي واحد بيكتب كلمة عن السلفيين بيسمع اللي عمره ما سمعه.. بيلاقي ناس علي الانترنت نازلة فيه شتيمة وتجريح وتكفير كمان.. ومش بس السلفيين اللي بيعملوا كده.. كلهم بيتكلموا عن الديمقراطية وكلهم ما بيسمعش إلا صوت نفسه وبس.. والباقيين غلطانين.. والباقيين لازم يختفوا من الساحة.. والباقيين لازم يفرض عليهم العزل السياسي ويروحوا ورا الشمس كمان.. ما هي حرية من جانب واحد.. واللي مش عاجبه يعمل له ثورة.. والثورة علي كل حال شغالة علي ودنه.. كله ثائر.. وكله عنده حزب.. ومفيش واحد عارف إيه الفرق بين كل الأحزاب الثورية اللي ظهرت.. والفرق بينها عامل زي الفرق في الطعم بين البيبسي كولا والكوكاكولا.. كله زي بعضه بيفور وبس..!
يالاهوي الدنيا سوده الحجاب عملنا ازمه عشان الستات لو لبسوا الحجاب الي اي مسلم ميختلفش على وجوبه هيموتنا ويرجعنا لورا ونبقى دوله دينيه معن الاسلام ميعرفش حاجه اسمها دوله دينيه هي موجوده بس عند المسيحيين في القرون الوسطى والنفق مسدود والخراب جي وان التقدم هيجي من الحريه المنفلته والستات تطلع تصور روحها عريانه وكلنا نبقى حققناالتقدم والازدهار وربنا يحمي مصر من الاحترام والاحتشام وحب الدين واعانكم الله على مساعدتنا لنكره دينا ولنمشي بحريه عرايا في الشوارع وربنا يطورلي مخي واتحرر من الافكار الرجعيه المتخلفه
واللة العظيم ياجماعة المقال دة هو الحق والواقع بعينة انا شفت من الناس دول العجب كلة بحكم ان مجموعة منهم جيران لينا واللة مايتعشرو وفيهم كل العبر لدرجة ان انا ساعات كنت بقعد مع نفسى واقول ازاى الناس دى تعرف ربنا وهما بيتعملو بغلاظة فظيعة مع الناس ويجبروك تعمل اللى هما عايزينة وعندى مواقف كتير ممكن احكى عليها ومش هتصدقو ان دول بيدعو للاسلام اصلا بجد منتهى الاستفزاز وربنا مقلش كدة ابدا ومش بس كدة دول بيخلو ستاتهم يلفو على البيوت ويجبرو الناس على انتخابهم وياخدوا ارقام بطايقهم وحاجات غريبه لاتدعو لاى حرية ولا ديموقراطية من اللى بيقولو عليها ولمل قلنالهم احنا مش عايزين ننتخب قالولنا انشالة عنكو مانتخابتو فين بقى الحرية اللى بيقولو عليها دول هيرجعونا لعصر الجاهلية
والله يا جماعه هيه مش تعصب ولا افكار سيئه ولا مسمومه قار ن بي العقل والحكمه بين انا او انت و اى وحد عادى ماشى بي الشار ع وفي وحده مش مر تديه الحجاب وتلبس بنطلون وغير ه من الملا بس الساخر ه ا يه ر د فعلك انت كا ر جل وليس تيوس ,,,,؟؟اكيد هتعاكس وتقول كلا م يسم البدن وبكده انت ار تكبت معصيه والى ما شئ بي الشار ع بقى تيوس وعليك بي الا ختيار يا اخى الفاضل هذهى سنه عن امهات المؤمنين على كل مسلمه وليسالمسلمه فق ولكنعلى كل بنت قبطيه لوتتر جع الى الله وتر السيده مر يم كمان مزكور الحاجاب بس بي الا نجيل الا صلى وليس المحر ف
انا شايف ان مقال اكثر من صح لان فعلا ازاي بقول حرية و ديمقراطية و اقول انا مش هطلع معاك غير لما تلبسي الحجاب
امال بعد كده هيعملوا اية بقي لو ده من اولها
المقال مش مستفز ولا حاجه ياجماعه الراجل عنده حق ، الاخوه اللي نتخفيين وراء الدقن والجلابيه القصيره لا يفقهوا اي شيء في الديموقراطيه ولا الحوار يااما توافقهم الرأي يااما تكون ذنديق وملحد ولابد ان يقام عليك الحد
إتق الله فينا بلاش الأفكار المسمومة اللي تسمم العقول
بصراحه موضوعك مقرف وكله استفزاز وسخريه وتسخين ارحمونا
yaslam 3aleek rbna ye5allik lomak ya 7eleetha