كلامى لسيادة المشير ولمجلسه كل الوقار , نفس الكلام لرئيس وزاره مهمته ( إحنا ) ومعاه كمان وزرا كبار , نعم لتصحيح المسار , لكل قاضى ومستشار , لرئيس نيابه وكل واحد مهنته العدل وفى إيده قرار , تصحيح مسار , ولكل شيخ جامع وواعظ فى الكنيسه وكل صحفى معاه قلم وكل من له حوار , تصحيح مسار , لكل إعلامى بيتحكم فى برنامج وشغله يدير حوار , تصحيح مسار , ولكل مُتحدث بيتحدث ويدخل صوته كل دار , تصحيح مسار , ولكل أستاذ جامعه وفصل فـ مدرسه بيعلموا لنا جيل جديد هيكونوا يوم صُناع قرار , تصحيح مسار , ولكل صانع كل زارع كل متوظف وشغله الناس , تصحيح مسار , ولكل جهبز من جهابزه السياسه وله فريق أقوللهم , تصحيح مسار , ولكل متحول ومتلون وصولى ونفعى برضه لازم لهم , تصحيح مسار , وأقول لنفسى وأقول لأهلى وأقول لكم كده كلكم , تصحيح مسار , تصحيح مسارنا كلنا – لما الأنانيه تروح من وسطنا يومها نقول تصحيح مسار , ويوم ما نعمل فيه حساب لكلمه ولفظ يخرج مننا هيكون فى ده تصحيح مسار , لما الكبار ميلعبوش فى دماغ صغارنا ويشحنوهم لخراب بلدنا كلنا يومها نقول تصحيح مسار , لما نكون بعقلنا نقدر نفرق مين يكون عدونا و مين حبيبنا يكون هنا تصحيح مسار , ويوم ما نقلب صفحه فى جرنال يفرق شملنا تصحيح مسار , لو يوم هيوزن عقلنا كل إللى نسمع ليه وبيتقال لنا هيكون فى ده تصحيح مسار , لما نحافظ كلنا على أمننا , وبلدنا , نبقى موانع للى غرضه يضرنا هنسمى ده تصحيح مسار , لو حد بيصور لأى مكان فى بلدى متكسفش وأحس يومها بالإفتخار وعشان دا يحصل عندنا لازم لنا تصحيح مسار , لازم نفكر كلنا إزاى فى يوم نكون كبار , إزاى يكون يوم لينا شأن ولينا كلمه بتتسمع يعمل حسابها بعيد وجار , إزاى نفسنا يبقى هادى وكلامنا من غير إنفعال , وإزاى نبطل عنتريه وهلفطه عالفاضى وبعقل نحسب الحساب , إزاى نجهز لإنتخاب , إزاى هنختار إللى نبنى بيه البلاد , إزاى نكون مفتحيين ومصحصحين وإللى هنختاره نكون بيه كسبانين , كفيانا ضحك عالدقون , إما نكون أو لا نكون , لازم نكون , نكون بإذن ربنا متوفقين وعلى بلدنا محوطين , وواحده واحده كل حاجه هتبقى عال , لكننا , لازم لنا تصحيح مسار , تصحيح مسارنا كلنا , وبعدها نبدأ مسار .
