ظيطه ودوشه زعيق وصويت أنا ليها سامع , بأسأل أنا طب جايه منين , ردوا عليا من آخر الشارع , قلت فيه إيه , ردوا وقالوا , بيقولوا فيه واحد إتجنن وفى البلكونه , عمال يصرخ , ليه مش بأفهم , ردوا عليا ياخلق ياهوه , ليه كده أنا مش فاهم حاجه , إيه إللى جرى لى , إيه إللى حصللى ,هما بيعملوا ليه كده فينا , ليه خلونى أحس بنفسى إنى حمار , وجيرانه بيسكتوا فيه وهو ياعينى يشد فى شعره يقطع فيه , والكلمه إللى على لسانه يقولها أنا يا إخوانا بقيت مش فاهم , رحت معاهم قلت أشوفه , الشارع مليان بالناس وبتتفرج , وعيال تضحك ناس بتهرج , بصيت ليه , ياخبر أبيض , دا الأسطى سعيد النجار , قلت أنا ليه , إيه ياسعيد , إيه إللى جرى لك , هوا فيه إيه , قاللى يابيه مش فاهم حاجه , يخبط راسه فى البلكونه , ويقوللى مش فاهم حاجه , قلت له ممكن أطلع عندك أشرب شاى وألا بخيل , ومراته واقفه وقالت لى , البيت بيتك , إتفضل دا نشيلك شيل , طلعت أنا ليه , دخان كده ومالى الأوضه وكمان تليفزيون مفتوح طفايه ومليانه سجاير عالترابيزه , إيه ياسعيد , إيه إللى جرى لك , تلفزيون قاعد قدامه زى العاده , بأتفرج وأسمع لبرامج فيها كلام , وإلى بيتقال مش بفهم منه أى كلام , ولقيت نفسى بأقول على نفسى إنى حمار , وفضيحتى على كل لسان , ليه ياسعيد كل دا يحصل , رد عليا وقاللى يابيه , إيه معنى كلمه ليبرالى قوللى يا بيه إيه معنى كلمه علمانى والمدنيه دى تطلع إيه , قوللى يابيه , شوف ياسعيد الليبرالى والعلمانى والمدنيه إخوات بعضيهم , أول حاجه إتوحدوا فيها إن الدين مركون على جنب , ومكانه دا يكون فى الجامع وألا كنيسه أو حتى معبد ليهود , أما الباقى فيه حريه , وإللى مابينا الإنتخابات , كله يكون بالإنتخابات , علاقات بينا فيه دستور يتكلم عنها , فيه دستور بموافقه شعب , كله بشورى وكله له رأى , ومفيش راجل ومفيش ست وألا فيه مسلم وألا مسيحى وألا يهودى فيه إنسان , ومفيش حد أحسن من حد وكله فى البشريه إخوان , رد سعيد طب ليه ناس ليهم رافضين , شوف ياسعيد إللى بيرفض ده ليه رأى , وبيقول فيه كده هنتوه وفى وسط الخلق , لينا حضاره ولينا كيان ليه بإيدينا يكون مطموس ومن غيره هنضيع من بعض وبكده إحنا نموت روحنا , من غير دين هنكون تايهين , من غير دين مش هتكون لنا حاجه تدل علينا , دا بيربطنا ويوحدنا ومن غيره مش هتقوم لنا قومه , رد سعيد دول الإخوان وإللى بيتكلموا بالدين , أنا بأسمعهم وبأفهم ليهم وكلامهم يوصللى بسرعه , قلت له طبعاً لازم يحصل أصل كلامهم بالقرآن , و إحنا لدينا مش كارهين , رد سعيد طب ليه فيه ناس ليهم رافضين , قلت له شوف الرافضين فيه منهم ناس بيكونوا خايفين ويقولوا عنهم دولا إللى هيقيموا الحد , وفى شريعتهم ظبط وحزم وعقوبات للى يخالف الشرع , أما كلامهم أهل الدين بيقولوا فيه دى شريعه ونظام متكامل لعلاقه بين فرد وربه وعلاقه بين فرد وفرد , بيقولوا القرآن دستور , دستور شامل جاى من سابع سما للأرض , وهوا شعارهم وهوا رايتهم , بيقولوا دستور الأرض , رد سعيد إيه إللى يزعل من ده كلام , قلت أنا ليه إللى يزعل إنه كلام ومفيش ليه تنفيذ عالأرض , دا كلامهم وبيتكلموا بيه لكن بينهم فيه إختلافات ولكل فريق منهم رأى , وهوا أساس توحيد الرأى , قاللى سعيد فيه كلمه بأسمعها كتير ومش فاهم ليها تفسير , قوللى يابيه البيروقراطيه دى تطلع إيه , قلت له شوف الكلمه دى معناها الحزم , والناس من أهلها للسلطه يكونوا ماسكين يعنى الحكم وكله بيمشى بظبط وحزم , وفى ناس تانيه قالوا عليها حكم العسكر , حزم وشده للى فى شغله دا بيستهتر , ظبط وربط وليها نظام , آدى معناها , خلاص ياسعيد , رد سعيد , دا إحنا فى حوسه , وإنت يابيه بتفضل مين , قلت أنا ليه , عايز رأيى , المفروض منهم كوكتيل , ناخد منهم أحلى ما فيهم وبلاش نرفض منهم حد , ولبعضينا نكون فاهمين إننا مبنستغناش عن بعض , أنا عايز منهم كوكتيل نكبر بيه ورايتنا تبقى فوق الكل , كوكتيل شعب , خلاص ياسعيد فاهم وألا لسه …. , قول ياسعيد , قاللى يابيه شكرى أنا ليك , العيب فيهم إللى سايبينا تايهيـــــــــــــــن .
