سيادة المشير / تحية من حديد .

سياده المشير / أنا واقف إنتباه – فى الوقت ده يا ريس مطلوب الإنتباه – لسيادتك إحترامى ولمجلس عسكرى ولجيش رجالته واقفه عنيها ما تنام – لكن بعد التحية وكمان الإحترام ( أنا متظلم ياريس ) وهبدأ الكلام – سيادة المشير لابد أن أٌشير إنى إشتكيت يا ريس لعصام بيه الأمير – مش برده رئيس وزاره ولازم نسأله – شكيت وقلت له – شعبك مبيختشيش مش عايز طبطبه – حريه ديمقراطيه فى حضانه بيبتدى – عايز أستاذ شديد يعرف يشد ويرخى لما الأمور تزيد – وقلت له الوزاره مكبره الدماغ – والدنيا تضرب تقلب وكله عالمشاع – عمارات عماله تعلا ومخالفه للقانون – ومرور كمان وماشى وفى عكس الإتجاه – أسعار تغلا ما ترخص وكله عالزبون وإحنا الزبون ودايماً بناخد عالقفا – وقلت له المواصله زادت ربعها – أنبوبه الغاز كمان زى المخدرات – حتى الخضار كمان سعره جاله إنتفاخ – سيادة المشير / مش هيا دى الأصول وبيها أنا إبتديت – لكن ليوم تاريخه ( كله محلك سر ) طيب فين الرقابه وفين الإهتمام – حتى سيادتك ياريس خليتنى مش بنام – بتقول الفقر زاد وده حال البلاد – برده مش إنتم ياريس علينا مسئولين – عايزينها تبقى ( ميرى ) ولكل واحد دور وإللى يقصر ياريس يعمل تسعه إستعد – ويتكدر ياريس ويشتغل بجد – وللشعب تربيه – كمان وتوعيه – الثوره خلاص وقامت لكن فين الشباب – شايفين وشوش قديمه بتجهز لإنتخاب وكل واحد فيهم عنده ملعبه – عايزين روح الفريق – ويكون فيه عنده خطه علشان الفوز يجيب – على فكره فيه خصوم مش عايزينا نقوم – لازم خطه ياريس علشان المعركه مش عايزين بهدله – هأقول وأعيد كمان عايزينها تبقى ميرى وكله يتسأل – ونبدأ بالفصايل وناخد التمام – وبعديها السرايا وتعرف شغلها – بيهم نبنى كتيبه تتولى أمرها – وكتيبه مع كتيبه هيكون فيه جيش كبير يتحمل همها – عارف أنا ياريس إنتم قدها – وسيادتك / فى الختام عايزينها تمشى جد وكفايه طبطبه – تحيه من حديد – وبأطلب الأنصراف – جندى مجند أشرف – واحد من أهلها .

اقرأ ايضاً صفحات رأي متعلقة على جريدة احداث اليوم:

• خـلـى الـدمـاغ صـاحـى
• شـركـاء الـوطـن عـزائـى لـكـم
• رسـالـة لـمجـلسـنـا الـعسـكـرى
• المـهـر غـالـى وضـيـعـوه
• عـايـز يـصـيـدك صــيــده