مددت عالسرير أريح جسمى حبه – ودماغى سرح كتير فى الأهل وفى الأحبه – وشويه فى السياسه وشويه فى البلد – وخطر فى بالى أبويا وهو فى قوته – ولما كان يصلى وكانت دعوته – بعد ما يختم صلاته – والكعبه قبلته – يرفع إيديه لفوق – وبكل حب وشوق – يارب إحسن ختامى وإجعلنى فى جنتك – مش هأنسى يوم مامات – الكل يومها بات – ساعتها الفجر أذن وردد الأدان – وختم كلامه يومها بشكر نعمته – الحمد ليك يا ربى بأموت على فرشتى – ومن كرمك يا ربى فى وسط عزوتى – الشكر ليك يا ربى على حسن ختمتى – وبافتكره كمان لما آن له الأوان – فى يوم ما أذن له ربه يحج حجته – أيامها راح يسلم عالأهل وعالجيران – ويقول سامحونى أهلى سامحونى يا جيران – لو كان فيه حد منكم فى يوم منى زعلان – ويقوللى – ( دى حقوق ) – عايز منها أفوق – علشان فى يوم ماأرجع تبيض صفحتى – ودماغى رايحه جايه – فى كلامه كله ليا – بيقول أهم حاجه راحه البال – ( دى السعاده ) – دا مفيش حد منا هياخد منها حاجه – وإللى هيبقى لنا فيها – ( السيره الطيبه ) – وفى أبويا وأنا سرحان – الصوره إتبدلت – ولريسنا إللى كان الصوره إتحولت – لقيتنى بأكلمه – بأحاول أفهمه – بقى يعنى يا مبارك – ربك لو جه فى بالك – كان ده هيبقى حالك – أكيد إنت نسيته – وسابك فى ضلالك – أعداء من أهل بيتك – هما إللى ضيعوك – مش برده هما دولا عالسكه دى خدوك – ودى سكه إللى يروح . . . – والباقى إنت فيه – فين إنت ؟ – فين ولادك ؟ – طب فين الأسم حتى ؟ – من كل مكان شالوه – تلاتين سنه بتزرع – طيب راح فين حصادك ؟ – فلوس – طب طظ فيها – عملت لك إيه ألفلوس ؟ – قالوا المال والبنون – فين المال والبنون ؟ – الكل وإنت شايف – بقوا الأتنين محبوسين – ( أللهم لا شماته ) – أنا مش بأكرهك – لكن زعلان عليك ونفسى أنصحك – صالح شعبك مبارك – ( مش عيب ) – وقوللهم – سامحونى غلطت فيكم – سامحونى قسيت عليكم – سامحونى أنا كنت دايماً قاعد مش وسطكم – خدوا إللى عندى كله – أنا طالب ودكم – عارف لو ده هيحصل – ( تبيض صفحتك ) – وتبقى يومها إنت ( عملت لأخرتك ) – إشترى نفسك مبارك وريح الضمير – ويومها لو هيحصل تبقى كسبت كتير – صالح شعبك مبارك – شعبك الطيبه فيه – وإعمل بكلام أبويا وإدعى دعوته – ( يارب إحسن ختامى وبلغنى جنتك ) – ألله يرحم أبويا – وينور سكتك .
f[]بجد عجبنى كلمك ونفسى ارددو ونفسى يباقلى اخ بنفس العقليه الطهر الشريفه وبجد اتمنا من الله ان ال الريس يشوف ويسمع كلامك ويعرف ان فى البلد ناس كويسه كتير وان الى كان معشرهم دول مش ناس دول قققاع المجتمع الفاسد اختاك مصريه معجبه بيك ربنا يحميك
كلام جميل زى الى كاتبة وربنا يقبل التوبة والمسامح كريم بس الحقوق كتير يارب اغفر وارحم وتوب على كل عاصى وعوض الصابرين وأجرهم فى مصيبتهم
ولله الكلام جميل جدا لكن مش مع الاشكال دة دة اشكال وطيةهى كلمة وحدة حبى لله ونعم الوكيل فى كل من سرق هذة البلد وخربها كدة
بجد صاحب الكلام فنان والمهم انه كلام بناء
ربنا يكثر من امثالك
بجد جميله أوي . اللي كتبها فنان ربنا يحمي كل من كتب كلمه من أجل البلدالحبيبه