الجو هادى ومش مُريح , دا هدوء مُريب , والشك فيه لازم يكون , إيه الحكايه ؟ ليه السكوت ؟ خلاص بقيتوا مُحبَطين , للى بيحصل فى البلد مِستسلمين , أول ثمار الثورة مِنا راح يضيع , لازم نفوق , اليأس ليه ؟ لازم نكون مِصحصَحين , دا بلدنا حالها و إتقلب من حال لحال فى أسبوعين , زلزال وخد وياه نظام من الجدور شاله وكنتم فرحانين , مقلب كبير خدناه وفيكم , عالهد بس إيديكوا قادرة وفى البُنا م الفشلانيين , الثورجيه راحوا فين , مبيتشافوش غير فى المظاهره فى الميدان بالملايين , من مجلس الشعب إللى جاى إنتوا فين ؟ راح صوتكوا فين ؟ قولوا إنطقوا وألا بقيتوا خرسانيين , فالحين فى ندب وولوله , وكلامكوا بس – الإخوان بقوا مِتحكمين , والسلفى دا معاهم بيمشى مشيُهم , وخلاص هتبقى إسلاميه ومن كده م المرعوبيين , مش ده كلامكم وألا أنا غلطان قولوا لو إنتم مظلومين , فين الشباب من توعيه لناس و مش فاهمه السياسه , ردوا وقولوا إنتوا فين , دول ناس كتير للي بيحصل جهلانين , ياثورجيه رُحتوا فين , فين الكلام وألا إِنتوا منه مِفلسين , عالنت كنتوا مجلجلين وفى المواقع موجودين , الوقت فين , فيه ناس كتير هتتوه فى زحمة الإنتخاب ويعَلِموا على أى قايمه أو أى إسم يشاور للهم بصباع عليه ناس غيركوا يبقوا مُنظمين , عايزيين مُظاهرات توعيه للفلاحين , عمال كمان لازم لهم تفهيم بأطياف البلد , فيه ناس خلاص ماسكه الودان , بيقولوا عالليبرالى كافر مَلهُش دين , وإنتوا فين , فى كل شارع كل سوق لازم تكونوا موجودين , فين العلام , فين الكلام إللى وبيه نقدر نِوَعي الناخبين , وألا خلاص سلمتوا رايه لناس وغيركم حسسوكم إنكم م المييتين , وشوشكوا فين , ليه عالشاشات مش موجودين , وحماسكوا فين , وألا خلاص حسيتوا إنكوا مهزومين , زلزال جديد عايزه يكون , ثوره جديده لتوعيه لناس كتير مش فاهمه حاجه ومحتاجين الفهمانيين , بالوقت ما تستهتروش دا لسه مِنه فيه كتير , دا نظام بحاله راح وبيكوا فى أسبوعين , فيه ناس كتير ذنبهم هيكون فى رقبه ناس كده زيكم مِقصَريين , خايف يقولوا دول عيال , وإللى بيمشى ورا العيال هياخد إيه , طبعاً كلكم عارفين , وزى مَا هديتوا القديم والدنيا قالت دول رجال , لازم تكونوا اليوم رجال ومتهربوش ساعه البُنا , وتسيبوا غيركوا يبنوا فيها إللى ليه عايزين , لازم تكونوا موجودين وللغلابه الجهلانين مِفهمين وموَعيين .
