تحية للدكتور بشار الاسد .. عشت وعاشت سوريا

يا شباب و يا صبايا لو كل واحد فينا بيرجع للتاريخ يلي درسو و يحاول يستنتج منو شي , اكيد كل انسان ولو على درجي بسيطة من الذكاء حيشوف انو هيدا التاريخ يلي كان يقرأه بالكتب صار ممكن يشوفو (لايف) مباشر على مختلف الاصعدة سواء المؤامرات الاستعمارية و تقاسم الحصص من الوطن العربي بين الدول العظمى يلي حاليا عبتحقق الحرية و الديمقراطية بليبيا متل الحرية يلي حققتها اميركا بالعراق وغيرها . طبعا هيدي الدول بتعرف كيف تخطط و كيف ممكن تحصل على اهدافها بأقل الخسائر و الاوضاع الراهني في البلاد العربية بتوضح بشكل صريح هيدا المخطط و الطريقة . طبعا ما في اسهل من انو يعلقوا الناس ببعضها و بأسهل طريقة هي طريقة الطائفية هيدا الموضوع كتيييير حساس عند كل العرب وهني بيشتغلو على هيدا الموضوع كونو سريع المفعول و قادر على انو يخلق مشاكل و مواجهات ما بتنطفي لسنين طويلي و اذا انطفت بتكون متل الجمر تحت الرماد . طبعا متل ما حاصل حاليا بأغلب الدول العربية المواجهات بين السنة والشيعة طبعا و بين الاديان او المذاهب الاخرى في المستقبل القريب , مما يستدعي دول الحرية و الديمقراطية انو تقوم بواجبها يلي بيترتب عليها انو تتفضل و تيجي تحل المشاكل و تحرر هالعرب المظلومين بالاحرى وعلى هالموال . اذا انتبهتو و اكيد الاكثرية انتبهت لانو مستحيل ما تلاحظو كيف كان الرد او بالاحرى التدخل لاميركا بالبحرين و كيف كان بليبيا طبعا البحرين بين الايادي هي و كل ثرواتها بينما ليبيا فيها ثروات كبيري كتييييييييير وهلق إجى الوقت المناسب لتقاسم الغنائم في ليبيا كما حصل في العراق معقوول ما حدا انتبه . طبعا الحديث بيطول على اطماع اميركا و غيرها , هلق بالنسبي لسورية يا شباااااب سوريا بيقول المثل اذا بتشوف مصيبة غيرك بتهون عليك مصيبتك انتو شو بدكن هيدا الرئيس شاب و مثقف و فهمان و بيفهم تماما شو مطالب الشباب بغض النظر عن بعض التجاوزات و التقصير و الاستغلال من قبل جهات معينة او اشخاص معينين انا بحكي عن تجربتي شخصيا في سوريا انا لبنانية و ضعي المادي ما كان يسمحلي انو ادفع تكاليف جامعاتنافي لبنان فجيت على سوريا و درست في جامعة دمشق كلية الهندسة المدنية طبعا ما بنكر كان في بعض الاشخاص و بركز على كلمة بعض انا ما بعرف شو وضعن العائلي او اي شي عنن صادفتن ببعض الدوائر الحكومية كانو سيئين جدا اما البعض الاخر كان بيتميز بالذوق والاحترام و حب تقديم المساعدي بكل صدق سواء على مستوى افراد من الشعب السوري او مستوى موظفين في الدوائر السورية حتى بالجامعة اسمحولي عمم انو كل يلي التقيت فيهن كانو بيتميزو بالطيبي و النخوي و الحب صدقا ومن دون مبالغة كمان على مستوى طلاب او موظفين يعني انا ما فيني غير اذكر سوريا و الشعب السوري بكل خير و بكل احترام لانو ما بيستاهلو أقل من هيك طبعا . و انا كلبنانية طبعا كتير تعرضت لهيدا السؤال و ين ما بسافر بيقولولي انو كيف اصحابك سوريين وانتو بلبنان كانو يعملو كذا كذا , طبعا انا بجاوبن انا ما فيني احكم على 23 مليون او اكتر من خلال مجموعات كانت تتصرف بطريقة سيئة كمان مش الكل لانو انا عبحكي عن تجربي في منن كتير كانو محترمين بس دائما التعميم غلط و الاخطاء صارت ما في داعي نضل واقفين عندها . طبعا انا حكيت كتيير و الحكي ما بيخلص بس رح حاول اختصر و قول سوريا بلد الامان بلد الشعب الطيب و الكريم بلد الرئيس الكريم يلي دائما حامل هموم المنطقة العربية وما بينسى شي كلنا منجي على سوريا لانو هي الحضن البديل عن حضن الوطن وقت يلي بيكون مش سايعنا انا ما بنسى انو تعلمت و تخرجت بسوريا ببلاش وانا لبنانية مش سوريا و متلي كتاااار سواء عراقية و اردنية و يمنيي و ……… كل الجنسيات مبالغ كتيير بسيطة تكلفنا و كان في سكن لكل الطلبي العرب و بمبالغ كتيييير زهيدي . طيب ليش انتو كسوريين ما تحافظو على هيك رئيس تنحسدوا عليه مهما كانت معاناتكن بسوريا انا على يقين اهون من اي بلد تاني اذا انت ماشي بالطريق السليم مين حيقرب صوبك و يضطهدك و اذا كان في تقصير من الدولي في مية طريقة للشكوى . لازم تنهار الدولي حتى نعمل اصلاح شو هالمنطق هيدا ما لحقتو حكيتو المطالب حتى كان محققها و اكتر من يلي بدكن ياه و شو بعد انتو شفتو كيف شو ما عمل الرئيس ما عمبيرضو هيدا دليل على شو ؟؟؟ معقول ما واضحة عبيقوموا بالمطاهرات بيطالبو حريي و سوريا طيب اوكي شو يعني شو بدك تتكون حر انت اصلا فهمان شو يعني الحريي حتى طالب فيها بلدك ليش انت قادر تحصل على الحرية المطلقة بيبيتك حتى طالب فيها بلدك شو يعني بدك دولي من دون قوانين ويجوبولك رئيس تفصيل على ذوقك ونشالله يعجبك كمان حتى تكون حر . الحكي يلي حكيتو انا بالاول بس توصلك فبل ما بتفكر انك تتحرر من بلدك يلي ربتك و كبرتك و علمتك فكر كيف ممكن تتحرر من الاستعمار يلي حيجي بحجة تحرير الشعب السوري من الحكم الظالم و منحو الحرية يلي عبيطالب فيها الشعب وقتها حتنال حريتك متلك متل ما حصل العراقي على حريتو متل ما حيحصل الليبي على حريتو مستقبلا . وين عقلكن وين انتو و وين يلي عبيصير بالوطن العربي اصحو شوي واضحة متل عين الشمس شافو ما زبطت المظاهرات بلشو يشتغلو بالشعب على الطائفية و المخربين والعصابات و المندسين بمختلف جنسياتهم و انتمائاتهن بدعم عربي اجنبي هيدا كلو ليييييش مش كرمال يعلقو العالم ببعضها عن طريق هالخونة و الأنذال كرمال يضطر ينزل الجيش لمحاربة العصابات و يستخدم الاسلحة و يصير في معارك و بعدين بتشرف اميركا بحجة انو النظام بيستخدم القمع مع المتظاهرين . انا بقول حتى لو كنت فعلا مذلول بوطنك ممكن يجيك وقت و تقدر ترفع راسك اما بعد ما تصير مش قاعد بوطنك و تصير ضيف موجود على ارضك برعاية اميركا تأكد انو إذا فكرت تحرك راسك تتحاول ترفعو حيكونو قصولك راسك قبل ما تحركو يعني ما بعرف هيدا ابسط شي ممكن الواحد يخطر ببالو و يفكر فيه انو مش صعب يعني .
بدي اختم بتحية كبيري كبيري للدكتور بشار حافظ الاسد عشت و عاشت سوريا شامخة للأبد , بشار و سوريا الله حامهين . بحب اشكرك كتيير يا دكتور بشار انت و الاب الخالد حافظ الاسد لانكن صنعتولي مستقبلي لانكن انتو يلي علمتوني و من جامعاتكن انا تخرجت و انا بفتخر فيكن و بتمنى من كل قلبي الصمود كما عهدناك يا قائد البطل و الله يكون معك و مع الشعب السوري و ينصرك على هؤلاء الخوني و المشردين المتطفلين على تراب و ارض سوريا

اقرأ ايضاً صفحات رأي متعلقة على جريدة احداث اليوم:

• نظام بشار الاسد انتهى
• هل جرت الرياح بما تشتهيه حكومة الرئيس بشار الأسد
• بصمة من شباب تشرين وإهدأ للرئيس بشار الاسد
• اسئلة لكل من يدافع عن بشار الاسد
• صدمة ثورة سوريا اصابت ازلامه بالهلوسه