السيد البابلي

احداث مصر

مشروع إيقاظ الشعب المصري

نفسي أعرف بيختاروا الوزراء ازاي في بلدنا..؟ بالاختبارات. ولا بالمؤهلات.. ولا بالمحبة والجدعنة وفلان ده كويس والله.. أصله بيسمع الكلام.. ومش بتاع مشاكل..
والله يرحمه الدكتور عاطف صدقي اختار وزراء حكومته مع اللي بيلعبوا معاه طاولة علي القهوة.. بس والله كانوا كويسين.. مش في الطاولة وإنما في الحكومة..!
والرئيس أنور السادات كان بيختار الوزراء نقاوة.. يعني يكونوا متريشين وشبعانين وعينهم مليانة.. ووزير زي منصور حسن لما اختاره وزير جاب من بيته أطقم الشاي والقهوة وكان بيركب عربيته مش عربية الحكومة..
ووزراء مبارك كانوا برضه نقاوة.. عندهم كل حاجة. لكن مابيشبعوش أبدا.. عرفوا سكة المليارات.. ودي سكة اللي بيدخلها بينسعر وبياكل أي واحد قدامه علي طول..
* وكله كوم.. ووزراء الأيام دي كوم تاني.. وأتحدي ان فيه من بين كل ألف مواطن مواطن واحد يعرف أسماءهم.. وحتي إحنا في الاعلام اختلط علينا الأمر.. ومش مهم نعرف الاسم وكفاية الوظيفة..!
وتعالوا نشوف بعضهم بيقول ايه.. وبيتسبب في إيه..
وزير الدولة لشئون البيئة الدكتور مصطفي حسين كامل حاول يتكلم في السياسة. فأول ما اتكلم وصف الشعب “بالنايم”. وقال ان احنا كنا نايمين طوال ال30سنة اللي فاتت. وان خطة ال100 يوم تهدف فقط لإيقاظنا من النوم..! وده طبعا أول تفسير من نوعه لخطة المائة يوم وقدمه الوزير الهمام للبيئة اللي ان شاء الله هايصحينا ويدلعنا ويهشتكنا..!
ووزير التعليم الدكتور ابراهيم غنيم حكايته بقي حكاية.. دا خلاها خل.. وطينها خالص.. ويستاهل البلاغ المرفوع ضده من المحامي الدكتور سمير صبري واللي بيتحقق فيه عند النائب العام.
فالوزير خرج علينا باكتشاف مثير جدا وهوه ان فيه 3 مدارس أجنبية في مصر بها شذوذ جنسي!!
والكلام خطير.. والخطورة مش في ان فيه فعلا شذوذ.. فده أمر إذا كان عند الوزير معلومات مؤكدة فكان من الأولي معالجة الموضوع بهدوء وحكمة ودون إساءة سمعة.. لكن الخطورة في ان الكلام ده المقصود من وراه ضرب المدارس الخاصة والتعليم الأجنبي.. والتحذير منه وروحوا للبديل.. وانتم عارفين البديل.. والوزير هدفه ايه وتطوير التعليم عنده مقصود من وراه إيه.. وشوفوا المناهج بتتغير ازاي وسيرة حسن البنا مؤسس الإخوان بقت بتنكتب إزاي..!
ونشوف الوزير الثالث اللواء أحمد زكي عابدين وزير التنمية المحلية بيقول ايه عن مشروع النهضة اللي الإخوان دخلوا بيه الانتخابات الرئاسية..!
الوزير ضرب كرسي في الكلوب.. وقال مشروع النهضة.. لسه ما انكتبش..!
وإحنا مش هانعلق.. الإخوان همه اللي يردوا عليه.. وعلينا كمان.. ويقولوا انكتب.. ولا ما انكتبش.. ملك ولا كتابة.. وخلوها علي الله..!
وأظرف حاجة في سيادة اللواء الوزير انه بيقول انه عرض علي الإعلاميين عمرو أديب ومني الشاذلي ونجيب ساويرس رجل الأعمال انهم يشتغلوا محافظين علشان يعرفوا قيمة المسئولية قبل النقد لكنهم رفضوا..!
وحلوة منك ياسيادة اللواء.. دمها خفيف قوي.. عاوزهم يكونوا محافظين علشان بس يسكتوا عن النقد.. هي دي كل المواصفات والصفات المطلوبة.. ياراجل قول كلام غير ده.. صحيح عرضت عليهم ورفضوا.. والنبي بيفهموا.. وعاقلين..!
ومفيش داعي نجيب أمثلة أكثر من كدة.. ومفيش داعي نتكلم. فالواحد عنده حالة إحباط مالهاش حدود.. والهم اللي علي القلب تشيله جبال.. فاللي بيحصل عندنا دلوقت غريب وبدل الفاسدين فيه فاشلين.. وكله عند العرب صابون.. وخلوها علي الله.

اقرأ ايضاً صفحات رأي متعلقة على جريدة احداث اليوم:

اضيف بتاريخ: Sunday, September 30th, 2012 في 23:09

كلمات جريدة احداث: ,

اترك تعليقاًً على هذا الرأي