الدكتور محمد البرادعي لازم ياخد جايزة نوبل مرة تانية.. والمرة دي الجايزة تكون في الحكمة.. فالراجل قرا المشهد السياسي العبثي اللي موجود في مصر دلوقت كويس قوي.. وعلشان كدة قرر إنه يكون أول المنسحبين من السباق الرئاسي.. مع إنه كان المفروض يكون في أول الطابور..
والمشهد عبثي ليه.. أقول لكم ليه.. لأن اللي عملوا الثورة بقوا بره واللي كانوا بيتفرجوا بقوا همه اللي جوه وكل واحد فيهم ضرب واحد من الثوار كتف وخد مكانه.. وكل واحد فيهم أثبت وبالدليل القاطع أنه كان من رواد ميدان التحرير وأن أولاده وأحفاده كانوا قاعدين هناك ليل ونهار.. وإن هوه اللي كان بيجيب الأكل للمعتصمين وبيجيب البطاطين كمان..
ولما الأونطجية دول بقوا همه اللي في الساحة يبقي لازم يخلصوا علي أي واحد يفكر يقرب حتي ولو كان البرادعي نفسه مفجر الثورة والراجل اللي اتكلم عن التغيير لما كنا إحنا كلنا بنطبطب وندلع وإحنا بنتكلم عن نفس المفهوم.. وكان الواحد فينا لما يعوز يطلع اللي في قلبه ويفرغ الشحنة يقوم يكتب مقال عرمرم يبهدل فيه حكومة الدكتور نظيف رئيس الوزراء السابق. بس ما يقربش من الرئيس وحرمه وابنه. ونقول كده رضا قوي. عملنا اللي علينا. ما هوه لما نهاجم نظيف يبقي بنهاجم مبارك برضه. ما هي الحكومة حكومته والنظام نظامه والرجالة رجالته.. يبقي إحنا قولنا حاجة برضه..
لكن البرادعي ركب الحصان.. وعمل فيها عرابي وقال إحنا لسنا عبيداً.. ولن نورث بعد اليوم..
وكلامه اتحقق والشباب قالوا إحنا وراك وحقق المعجزة.. لكن في نص السكة قال ستوب.. لغاية كده وكفاية..
وكفاية ليه.. كفاية لأن الضرب تحت الحزام علي ودنه.. والتشويه شغال يمين وشمال.. وخطباء المساجد مفيش في كلامهم حاجة إلا البرادعي إللي أصبح القاسم المشترك الأعظم في كل حملات الهجوم.. ولأن الزن علي الودان أمر من السحر. فإن الناس صدقت.. ولو البرادعي كان نزل الانتخابات كان هايطلع بهزيمة زي اللي الأهلي ولا الزمالك هايشوفوها لو لعبوا مثلاً قدام برشلونة.. وكان ميسي في يوم حظه والكورة مطاوعاه..!
واللي هرب منه البرادعي بيحصل دلوقت لكل مرشحي الرئاسة. كله بيعجن في كله. والفيس بوك شغال علي ودنه.. بيفتح الأسرار ويحكي الحكايات ويجيب الفيديوهات ويحسب لكل واحد أخطاءه من ساعة ما ولدته أمه إلي ساعة ما فكر إنه يقول أنا مرشح محتمل..!
وياعيني عليك يا شفيق واليوم اللي قلت فيه إنك هاتبعت بونبوني للمعتصمين في ميدان التحرير لما كنت رئيس وزراء بعد الثورة.. من ساعتها وحكاية البونبوني دي بقت لازمة. ومصيبة. واللي عاوز يهاجمك يبدأ بالبونبوني وبعدين يشد ويسخن ويفتح ملفات ويقول اتهامات. وكل واحد منها لو ثبت صحته لاستوجب الوجود في المزرعة جنب الحبايب..
وآه يا عم عمرو.. لا شعبان عبدالرحيم نافع.. ولا كراهية إسرائيل بتشفع.. اللي ماسكين عمرو موسي عاوزين يخلوه من الفلول بأي شكل.. ومادام اشتغل مع مبارك يبقي فلول.. ولو كانت الحكاية كده يبقي مصر كلها فلول.. فكل علي الساحة كانوا مع مبارك وابن مبارك وحفيد مبارك كمان..
ويا سلام علي منصور حسن.. واحد من الرجال المحترمين. فاكر إن لسه فيه أخلاق فرسان في الساحة.. مايعرفش إن الفلتان مش أمني وبس. دا الانفلات الأخلاقي أشد وأعظم.. واوعي تفتكر إنهم هايحترموا المواقف والتاريخ. دول لا عندهم تاريخ ولا جغرافيا.. كله عندهم لازم يتقطع.. وكله ينوبه من الحظ جانب.. واللي عاوز إيه مش لازم يقول إيه.. وبلاش نجيب المثل بالنص لأنه عيب.. ومجمع اللغة العربية حاول يدافع عن التفسيرات اللغوية والأمثال ووقف في صف زياد العليمي. لكن معانا يمكن يقول العكس ويودينا في داهية..
ومش ها أتكلم كتير عن صديقنا حمدين صباحي ولا عن الراجل اللي لسه واقف مكانه من أيام السادات ما قاله خليك مكانك الدكتور عبدالمنعم أبوالفتوح. ولا عن حازم أبوإسماعيل اللي أتباعه طايحين في الكل ولو حد قرب من أبوإسماعيل هايبقي زنديق وكافر كمان.. ولا هانقول حاجة عن العوا. وكفاية اللي بيشوفه ويتعرض له وإنه بتاع الجيش وحبيب المجلس العسكري.. وإحنا بالمناسبة مش عارفين مين حبايب المجلس ومين اللي ضده.. فالحكاية أصلها مش حب أو كره.. الحكاية حكاية تقييم مواقف. يعني إحنا النهاردة ممكن نكون مع المجلس وبكره ضده. فالمجلس بيلعب سياسة. واللي بيلعب لازم يغلط في تمريرة أو في شوطة.. مش معقول يعني يكون بيلعب في الملعب لوحده.. أو بيشوط علي مرمي مفيش فيه حارس..!
وإحنا بنقول بس.. إن إحنا لسه مش متعودين علي معارك رئاسية بجد.. وإن إحنا عاوزين نتفرج علي مباراة حلوة ودرس جميل في الاحترام.. وبلاش الحاجات الشخصية قوي. وخلينا في المضمون.. إحنا مش أمريكا ولا أوروبا.. هناك متعودين علي الشتايم والفضايح وبيعيشوا معاها عادي.. عادي.. إنما إحنا عمر الواحد فينا ما بينسي كلمة اتقالت عليه ولا مين قالها.. واسألوا العرب كانوا بيقولوا إيه.. جرح السيف أرحم من جرح الكلمة.. فجرح السيف قد يبرأ.. أما جرح الكلمة فلا يبرأ أبداً..!
السيد البابلي
انتخابات الرئاسة
حملات مرشحي الرئاسة كله بيعجن في كله
اضيف بتاريخ: Monday, March 19th, 2012 في 11:23
كلمات جريدة احداث: احداث, انتخابات, مصر
الحقيقه ان نص الكلام حقيقه اما بالنسبه للبرادعى انت مخطىء يااستاذ افتكر اول ما نزل النوبه قال ايه ؟ وزى ما خرب العراق جاى يدور علينا واسال امه امريكا اللى كان عايش فيها وبينفز المطلوب منه لانه لو كان حر كان استقال من منصبه ولكن الدولار له اهميته ومن حقه يكون رئيس 6ابريل وشكرا