بهاء ابو زيد

احداث مصر

مواقف المصريين من الجيش المصري الان

أعتقد مواقف الناس من موقف الجيش النهاردة تنحصر في النماذج دي:

1- الإخوانجي: شايف حلمه بيضيع، وأستاذية العالم هياخدها في … وأعتقد كلهم حاسين بالنهاية من جواهم. وبمجرد تنضيف الدولة من التنظيم، هيهدى تمامًا ويعيش في عقدة الاضطهاد زي زمان.

2- الإسلامي إللى عايز ياكل عيش: هيقول دي فتنة ماليش فيها، ويا رب سلم، وممكن آخره يدعي لمرسي.

3- الإسلامجي المجنون: هيقوم بعنف، وممكن بعد تنضيف الدولة يعمل إرهاب وسيارات مفخخة، وفي الغالب ده هيكون مصدر الشرعية للـ order الجديد.

4- شمام الكلة: ده في رأيي نوعين واحد مخلص لمبادءه والمبادئ عنده لا تتجزأ ولا تتغير، وده من أخطر أنواع البشر، وكتير من الشر في العالم بيعمله دول بحسن نية. ونوع تاني مستفيد بالوضع الحالي ومش لاقي لنفسه مكان في الوضع الجديد (السبوبة هتضيع). ومش شرط الاستفادة تبقى مادية، ولكنها ممكن تبقى نفسية وأهمية القضية بالنسبة ليه بأهمية تحقيق الذات والشعور بأهميته. عامة التعامل مع دول مش هيكون غير بالحرب النفسية، المنطق مش هينفع معاهم، لازم نخليهم يتكسفوا يمارسوا هراءهم، ويتم إرهابهم فكريًا زي ما عملوا مثلا في إللى أيدوا شفيق في الانتخابات السابقة.

5- العقلاني المعارض للخطوات الأخيرة، بحجة إن ده هيؤدي لسكة مش معروفة وعنف وإرهاب وهيقضي على الديمقراطية … إلخ. بس أنا شايف إنهم بيتجاهلوا تمامًا إن المسار الطبيعي هيؤدي لكل ده برده. مرسي لو مشي بانتخابات بعد 3 سنين، هيحصل إرهاب برده، والجماعات هتكون قويت أكتر. والديمقراطية تم اغتيالها خلاص بإجراءات نوفمبر إللى فات (الإعلان الدستوري)، والانهيار الاقتصادي هيكون أسوأ في ظل استمرار مرسي، واستمرار حدوث احتجاجات جبارة ضده لن تهدأ. كل المسارات خرا، لكن إللى احنا فيه ده بيخلينا ننجز وناخد الخرا كله بسرعة.

6- عقلاني مؤيد للخطوات الأخيرة. وبينظر بواقعية للأمور، وشايف خطر استمرار مرسي بالوضع ده، وراجل مؤيد للـ Common Sense، ومؤمن جدًا بحق الناس العادية في ترتيب أولوياتها. ودول مش هتكلم عنهم كتير، لأني منهم ومنحاز ليهم.

اقرأ ايضاً صفحات رأي متعلقة على جريدة احداث اليوم:

اضيف بتاريخ: Tuesday, July 2nd, 2013 في 04:51

كلمات جريدة احداث: ,

اترك تعليقاًً على هذا الرأي