مسعد أبو فجر

احداث مصر

قطر تشعل الفتنة بين اهالي سيناء

حكيت لكم سابقا عن ال ٣٥٠ مليون دولار اللي تبرعت بها قطر لغزة. وقلت لكم ان الفلوس في قطر وان قطر هي اللي بتسند الأعمال على الأرض للمقاولين وهي اللي بتحاسبهم بفواتير. والفواتير بيتم مراجعتها بواسطة الس أي ايه. وواحد قال: وفي الموساد كمان. ايه الجديد اليوم؟!. عشيرتين من عشائر قبيلتي الفخيمة، على وشك حرب تشبه حرب داحس والغبراء. خير يا سيدي اللهم اجعله خير. آه شوف يا سيدي شركة المقاولين العرب تعاقدت مع السفارة القطرية، على مقاولة توريد الزلط لغزة مقابل ١٥ جنيها للمتر الواحد. وعشان قبيلتي عايشة ع المعبر قامت المقاولين العرب أعطت توكيل تشوين الزلط وحراسته لواحد من رجال قبيلتنا العظيمة. طيب وبعدين، الحكي لحد هنا جميل. الزلط بيجي ويتشون وينطر (يعني تتم غفارته) الى ان تستلمه حماس. لحد هنا والحكي جميل والاشية ماشية معدن. جت شركة فلسطينية وعرضت على السفارة القطرية ان تورد الزلط لغزة ب ٨ جنيه للمتر الواحد. قوم قطر عملت ايه؟. لم تجدد عقد توريد الزلط لغزة لشركة المقاولين العرب وأسندته للشركة الفلسطينية (اللي قالولي اسمها حاجة انجليزي كذا.. لم اهتم به ونسيته). لحد هنا والشغل ماشي عادي. قطر سحبت عقد توريد الزلط لغزة من شركة مصرية وأعطته لشركة فلسطينية. عادي جدا وما فيش حاجة خالص.. جت الشركة الفلسطينية وشغلت واحد من رجال قبيلتنا الفخيمة ليقوم بدور تشوين وغفرة الزلط. بس من عشيرة ثانية غير عشيرة صاحبنا الأول.
صاحبنا الأول الحين راسه وألف سيف ما تعدي ولا زلطة لغزة غير بأمره هو. وجاب الرجال والسلاح، قوم الرجل الثاني جاب الرجال والسلاح. وصرنا على حافة حرب عشائرية.
بس العاقلين بيقولوا. الجيش هو اللي بيورد الأسمنت. ولو استمر الصراع سيتدخل الجيش ويحط عقد توريد الزلط على عقد توريد الأسمنت تحت باطه..

اقرأ ايضاً صفحات رأي متعلقة على جريدة احداث اليوم:

اضيف بتاريخ: Saturday, April 13th, 2013 في 12:53

كلمات جريدة احداث: , , ,

اترك تعليقاًً على هذا الرأي