سارة معروف

احداث مصر

كيف نسقط جماعة الاخوان المحظورة

 

تحذير : اذا كنت تنتمي لجماعة الاخوان المسلمين او مجرد محب ليها او متعاطف معاها ولسه بتقول دول ناس بتوع ربنا انصحك ما تكملش قراية .

اذا كنت من اللجان الالكترونية التي اسسها  وانشأها بقال الجماعة ورجاله فلازم نذكرك بحديث الرسول للي رواه البخاري { إن من أكبر الكبائر أن يلعن ، الرجل والديه . قيل يا رسول الله وكيف يلعن الرجل والديه ؟ قال يسب أبا الرجل فيسب أباه ، ويسب أمه فيسب أمه }

فليه تجيب التهزيق لنفسك ولاهلك ، ما هو اكيد لو غلطت ها تلاقي اللي يغلط فيك ونفضل بدوامة ونتنابز بالشتائم وبالمسبات فبلاها احسن .

لو حضرتك مواطن عادي كنت مع او ضد الثورة لكن بالوقت ذاته شايف ان الدكتور محمد مرسي لسه عنده شرعية وانه مش قاعد على كرسي الرئاسة بالوقت الحالي بوضع اليد وبسياسة الامر الواقع واعلى ما في خيلكم يا شعب اركبوه ، برضه ما تكملش لانه الكلام مش ها يعجبك .

لو لسه في حد مكمل قراية وتحديدا من المواطنين اللي دايما بيتسائلوا مصر رايحة على فين وحال البلد مش عاجبهم وكمان صعبان عليهم نغرس في الطين اكتر ونوصل لمصير مؤلم زي سوريا او ليبيا وخلافه فانصحك تكمل ونشوف اخرتها ايه بس اولا يعني اللي اوله شرط اخره نور :

لو كنت مؤمن بايدلوجية او فكر معين او عندك نظرية ما ورؤية ماشي عليها ومش عايز تحيد عنها احب اقولك انه الوضع الحالي في مصر فاق كل التوقعات ولذا مش ها تقدر تمشيها على هوى فكر معين ، لازم سيادتك تعمل موازنة بين افكارك واللي بيجري على ارض الواقع وتنزل تمشي ع الارض عشان تحسبها صح ، وتوصل للاهداف اللي أي مواطن لسه بكامل قواه العقلية بيطالب بيها وهي عيش حرية عدالة اجتماعية كرامة انسانية .

ملحوظة بس ع الماشي انا من انصار نموذج الدول  العلمانية اللي بيقولوا عليها كافرة ، اللي حضرك مستعد تركب مركب صيد عشان توصل لاراضيها ، وانت مهدد بالموت في اي لحظة وانت في طريق اليها ، ويمكن لو وصلت ما تلاقيش فرصة عمل فيها تناسب مؤهلك وقدراتك فتضطر تغسل صحون او تمسح جزم ، بس بتروح لانها دول فيها عدالة وبتديك حقك وبتعاملك بالحسنى وده اللي مش ها تلاقيه في بلدك ، والي جنابك بتفضلها عن الدول تبع شرع الله  .

وانا من انصار تلك الدول الكافرة اللي حقوق الحيوان فيها احسن من حقوق الانسان في الدول المؤمنة بتاعتنا

تلك الدول العلمانية الكافرة اللي لو غلط مواطن ينتمي ليها فيك وانت غريب ممكن تقاضيه وتقدر تاخد حقك منه .

من انصار الدول ايضا اللي حضرتك بتشوف عم الشيخ رايح يدعي في شوارعها للدين الاسلامي بكل اريحية  ومحدش بيضايقه ولا بيقرب ليه وهنا عمال يحكيلك عن المؤامرة الكبرى على الدين وكيف ان تلك الدول بتضطهدهم وتشجع الفجور وخلافه ولو حد قال كلمة تخالفه بالرأي يلبسك تهمة ازدراء اديان وممكن يبعتك وراء القضبان .

*****

( وبالمرة ضع في معلومك اني لا اجد اي فارق بين نظام بشار الاسد والنظام الحاكم الحالي في مصر الممثل في جماعة الاخوان ، ده حتى بشار معملش كده في اول حكمه ما بدأش بالسحل والقتل والتعرية وهتك الاعراض مفضلش يكدب على شعبه ليل نهار عيني عينك ، وطبعا الاتنين سفاحين ولو حاولت تشيلهم عشان تحصل على حقوقك ها تدخل في معركة يا تكون فيها قاتل او مقتول .

لكن ازاي نتخلص من الاحتلال الاخواني باقل الخسائر هنا السؤال الاساسي:

مش سر ولا حاجة انك تقول ان الحل الوحيد للتخلص منهم هو ( امريكا )

طبعا الكلام هاييجي على غير هوا القومجيين ومعتنقي فكرة المؤامرة وهانسمع احلى كلام عن العمالة والاستقواء بالخارج

لكن الحقيقة المرة ان اي حد يقول غير كده بيضحك على نفسه وعلى الي حواليه ، اه امريكا هي صاحبة الامر والنهي في مصائرنا يا سادة

ولولا امريكا لبقى مبارك حتى الان في الحكم ، ولم ينحاز الجيش المصري والمجلس العسكري للشارع ، ولو مش مصدق راجع الاخبار ايام الثورة امتى المجلس العسكري بدأ يدي تطمينات للشعب ويعلنها صراحة ويصدر بيانات بدون الرجوع الى مبارك ( رغم انه كان يفترض ان  مبارك بيرأس المجلس العسكري ، ومنين بيرأسه ويتم تمرير بيانات بدون علمه وموافقته ) ،حصل ده تحديدا امتى لما سامي عنان رجع من ( امريكا ) يعني ظبط المسائل واتفق معاهم وخلاص

وصحيح امريكا هي الطاعون والطاعون امريكا لكن لاجل الورد ينسقي العليق ، لازمن الحوار مع امريكا ولكن بدون انتهاك لسيادة الدولة وايه المانع   ،في اننا نطالب امريكا انها تبقى على الحياد وتبطل دعم للجماعات الارهابية ( المحظورة )عندنا ،صحيح انا لا يساورني الشك بتاتا في ان امريكا لا يهمها حقوق انسان ولا مين يحزنون المهم مصالحها بس وقوفها ع الحياد احسن من تدعيمها للنظام المستبد اللي اصبح بيستقوى بامريكا علينا .

لو حد من الخرفان رجع قال عمالة واستقواء بالخارج نذكركم ان جماعة الاخوان المحظورة بدأت الحوار مع امريكا والقوى الاروربية والعالمية الاخرى من عام 2004 فلو ده خيانة يفترض تلموا الجماعة دي في السجون لانهم كانوا وقتها بيتأمروا علينا ويتحاكموا بتهمة الخيانة العظمى وكفى الله المؤمنين شر القتال ، وساعتها نطوي صفحة امريكا ومش ها نفتحها .

اما لو الكلام مع امريكا عادي زي ما كانوا بيعملوا خلاص هو مش حرام لينا وحلال ليهم .

لكن كيف تصل بصوتك الى امريكا ، محتاج اعلام قوي حتى لو كان ع الحياد يوصل صوتك ، محتاج انك توازن الامور وترتبها وتعرف ها تقول ايه وقتها ، وممكن تلفت النظر باعتصام كام يوم قدام السفارة وحواليها ، وحتى لا تشتبك مع الامن ويسقط ضحايا حاول تلم اكبر عدد وتقطع الطرق المؤدية للسفارة الامريكية واطلب مقابلتهم ها يخضعوا ليك ، او اعمل زي الجماعة  استعين مثلا بالدكتور سعد الدين ابراهيم وقوله احنا مجموعة كزا رابطة كزا نحمل فكر كزا وعايزين نتحاور مع امريكا وهو لو اقتنع ممكن يوصلك .

لازمن نأكد تاني لو حد ها يرجع يقول خيانة وغيره انا بقولها على بلاطة لا اريد ولا اسعى ولا انادي بتدخل امريكا بس تبطل دعم جماعة الاخوان وتقف ع الحياد وتسيبنا في حالها ، وهي مصلحتها بس معانا في امن اسرائيل ،واحنا اساسا مش فاضيين لعزرائيل يعني ولا هاندخل معاها حرب ولا ناويين ، لأن احنا منهكين اساسا من الامراض والفقر وكل الاحوال المعيشية السيئة غير انه ببساطة عارفين انه اخرنا نلعب مع منتخب اسرائيل لكرة القدم ويمكن نخسر ، لكن لو لعبناها حرب دفاعا عن الكرامة والشعب العنيد يبقى جبناها لانفسنا ودخلنا نفسنا في لعبة احنا مش قدها ولا لدينا الامكانيات ليها اساسا ، ايه ها تحارب اسرائيل وتجاهدهم بالسيف ولا بالنبوت .

انتهى موضوع امريكا

***

شدني الفترة اللي فاتت دعاوي من بعض الشباب اللي لسه بيقول سلمية سلمية وبيقول نعمل تواقيع لكزا، مثلا لمقاطعة الانتخابات ( هو بأي حق اساسا الدكتور مرسي ينادي بعمل انتخابات وهو رئيس انتهك شرعيته بايده ومشكوك في شرعيته حتى من بداية جلوسه على الكرسي )  ، كده الجماعة بتجر كل القوى السياسية والثورية كما يحدث في كل مرة لملعبها وبتكسبك ولو جمعت حضرتك تواقيع من الشعب كله تنادي برحيل محمد مرسي او بمقاطعة الانتخابات ولا ليها اي تأثير عليهم مش قولنا انه الان الدكتور محمد مرسي رئيس بوضع اليد .

اه لازم يرجع الزخم الثوري للشارع بس ازاي والناس العادية فقدت ثقتها في المعارضة الممثلة في جبهة الانقاذ مثلا وده بسبب تخبطها في معظم  قراراتها وكأنهم مجموعة تلاميذ في حضانة لسه ولا مبتدأين في عالم السياسة كلمة توديهم وكلمة تجيبهم ، وعلى سبيل المثال لا الحصر رفض البرادعي للحوار مع امريكا ( يا عم البرادعي كنت ع الاقل احكي عن انتهاكاتهم لادمية المواطنين وسياستهم المتخبطة في مصر واظهر وجههم القبيح قدام المجتمع الدولي ) ،وكذلك موضوع نقاطع الاستفتاء ، ما نقاطعش ، طيب يلا يا جماعة انزلوا بسرعة صوتوا بلا .

لو انت مش قادر تاخد موقف ثابت وها تفضل متردد ومهزوز خلاص انسحب من المشهد وريحنا .

نرجع تاني ازاي تكسب الشارع ما حضرتك لازم تجيبه من الناحية اللي بتهمه وبتوجعه وبتأثر عليه زي مثلا ارتفاع الاسعار ، الضرائب زيادة اسعار الكهرباء والغاز ، زيادة الدين الداخلي ومحاولات بيع مصر عن طريق الصكوك – اللي قالوا عليها اسلامية وبعدين طلعت مش اسلامية  ، البنية التحتية والحياة اللي تقرف وغيره ، وان مفيش نهضة ولا مين يحزنون وبالتالي الوضع الاقتصادي ها يفضل من سيء لاسوء والبطالة ها تزيد الى اخره .

طيب ما الاعلام ليل نهار بيقول الكلام ده

ما هو حضرتك لو قعدت تقول لعيان عندك مرض خبيث عندك مرض خبيث عندك بلا اسود في جتتك ، في الاخر ها يستسلم ويرضى بنصيبه ويسلم نفسه للامر الواقع وها يقولك خلاص اللي يمشي  على غيري يمشي عليا

لكن قوله ان في امل للخلاص وانك مش لازم تقف ساكت مادام في ايدك تاخد حقوقك وكمان حط رؤية وبرنامج قابل للتنفيذ الفوري على جميع القطاعات والمستويات ( بس مش زي البرامج الانتخابية اللي بتكون لمجرد الدعاية وكلام ولت وعجن لا يودي ولا يجيب )

لا نقاط واضحة ممكن تطبقها على ارض الوقع وتجيب نتيجة ملحوظة وفورية لو عملتها ، قول احنا نطالب ( بلاش ننوي يفتكروك طمعان في السلطة ): بتطبيق فوري لحد ادنى واقصى للاجور ( يمكن حد يقولك ما هو ده تم اقراره) نرجع نقولك بص حواليك ما تقوله الجماعة شيء وما تفعله شيء اخر ، كمان في الوقت الحالي  انت طبقت حد ادنى للاجور مع ارتفاع معدل التضخم يبقى لو انت مواطن كنت بتقبض 200 جنيه واصبحوا 840 مش ها تفرق معاك نهائي نفس اللي كنت ها تشتريه بال 200 جنيه ها ترجع تجيبه بال 800

وهكذا ، لانه طبيعي ها تلاقي مليون مين يسألك ماذا بعد مرسي

وعلى فكرة رجل الشارع العادي فقد ثقته في الوجوه المعروفة اللهم الا قليلا  ، واعتبر حديثهم عن شرعية مرسي رغم التعذيب وانتهاك القضاء وسقوط الشهداء وغيره ، وقبولهم بالتفاوض احيانا ولو بالتلميح تخاذل ، لذا لازم تحصل عملية تباديل وتوافيق وتظهر وجوه جديدة

******

النقطة الثانية : الجيش

اول حاجة ها تخطر على بال البعض اذا كلمتهم عن الجيش هو ترديدهم لكلمة حق الشهداء وبدون تفكير ،حاليا نأسف واحنا بنقول ان حق الشهدا ضاع   وكل يوم بيسقط شهداء جدد وها تفضل  بتنادي بحقوقهم ولا حياة لمن تنادي ، يبقى لازم توازن الامور بحيث تقدر تجيب حقوقهم او على الاقل تحقق اللي هما طالبوا بيه وهو عيش حرية عدالة اجتماعية ، ووقتها اعرف انه ها يكونوا مرتاحين وكمان ها تقفل حنفية الدم شوية لانه لما بتنفتح مهما عملت مستحيل تقفلها

الجيش تخبط كثيرا جدا في قراراته في الفترة اللي حكم بيها البلد اه .. ارتكب المجلس العسكري جرائم زي ماسبيرو ، محمد محمود ، مجلس الوزراء  نعم ، سلمنا لجماعة الاخوان المسلمين تسليم اهالي وباعنا من الاخر مظبوط ، ساعد على انتهاك سيادة الدولة بجدارة لما سمح لارهابيي القاعدة بالتجول والدخول الى مصر  امنين مطمئنين والاقامة في سيناء  كلام سليم ، ده غير تخاذله قدام جبروت الجماعة اللي خرج مثلا نائب المرشد فيها اللي اسمه خيرت الشاطر يقولك انهم بيتجسسوا على الجيش ولا تمت مسائلته او محاكمته بتهمة الخيانة .

طيب  هل نأمن للجيش بعد كل ده وازاي ؟

راجع ما قلناه سابقا وخليك صريح مع نفسك مين بيحرك الجيش امريكا ، تمام؟

هل نقبل بانقلاب عسكري لا ، ولا انادي بيه اساسا

طيب ، ما المطلوب

الدولة بيتم تفتيتها بشكل غير طبيعي وجيش مصر يفترض انه حاميها يعني لو سكت على ما يحدث معناها انه مشارك في الجريمة اما يقف امام هذه الجماعة اللي فوق القانون ، وينقذنا منها او يعلن صراحة وقوفه في صف الجماعة وقبوله انه يكون جزء من التنظيم الدولي للاخوان .

لكن على المستوى السياسي الجيش اثبت فشله في ادارة الامور ، لكن احنا ممكن نقبله كحامي للشرعية ولان رجل الشارع العادي حتى لو حاسس بغضب من الجيش فلا ملجأ من الجماعة الا اليه ، بس برضه بعد موضوع امريكا .

تحدثوا مع الجيش احنا نريدكم حماة للشرعية بجد ، لكن الشرعية الحقيقية مش تبع الصناديق المزورة .

على بلاطة اذا لجأت للجيش عليك ان تقوله من الاخر وجودك ورجوعك للساحة لازم يكون بحساب وعلى ان يتم محاسبة المجرمين اللي ممكن تأجلها شوية حتى تقوم الدولة على رجليها وتصبح شبه دولة على الاقل ، ثانيا الحسنات ممكن يذهبن السيئات لكن احنا مش عايزين حكم عسكري يعني حتى لو كنت على رأس السلطة شكليا لازمن تستعين بحكومة تسيير وادارة اعمال من ذوي الخبرات وتديها كل الصلاحيات اللي تقدر تنقذ بيها الاقتصاد مثلا وتساعدك في تطبيق البرنامج او الخطة السابقة اللي بتكون جنابك محضرها سلفا عشان تكسب الشارع لصفك .

******

يمكن اصابك الملل من كل ما ذكرته او تصب وابل من اللعنات والشتايم عليا لكن بالنهاية لو في حد عنده رؤية تانية اتفضل اطرحها ـ قبل ما نمشي بخطى سريعة وثابتة باتجاه السيناريو السوري

واخيرا الى من  يهمه الامر :

العقرب   سام لكن كل السم موجود في ديله وممكن تتخلص من العقرب نهائيا بقتله لكن افضل الطرق هي حرق الديل وبكده العقرب يعيش وتتخلص من سمه وخطره للابد

اقرأ ايضاً صفحات رأي متعلقة على جريدة احداث اليوم:

اضيف بتاريخ: Wednesday, February 27th, 2013 في 21:23

كلمات جريدة احداث: ,

2 رد to “كيف نسقط جماعة الاخوان المحظورة”

  1. اسامه توحيد
    10/03/2013 at 08:00

    اسس علميه هههههههههههه هو الاخوان تعرف اسس علميه

  2. عطف ابراهيم يوسف
    05/03/2013 at 19:10

    يااالله ياراجل كتبت كل ه فىكام يوم مه ياابن تضييع للقت وعشان لاابقى زىك واضيع وقتك الحل الوحيد لاتفكر فى كيف تتخلص من حكم الاخوان فكر فى ماهو دورك اللذى يجب ان تقوم به لاتطوير مصر على اسس علميه وليس على الكتابه فى ارفيس لرك

اترك تعليقاًً على هذا الرأي