علاء عبد السلام

احداث مصر

انا وحزب الكنبة في مظاهرات ميدان التحرير

انا من المواطنين المصريين اللي مش بيثقوا في النخبة ولا في الجماعة الحاكمة دلوقتي وشايف حال البلد زي ما هو ويمكن الوضع العام اسوأ من ايام مبارك بمراحل رغم الفساد اللي كان فيه لكن كل يوم الاسعار بتزيد وكل ساعة بيطلع علينا واحد يكفرنا وغير العالم الجديدة الي بتفكرك بمسرحية احمد نجم كل واحد فيهم يركب دقن ويعمل له زبيبة ويفتكر انه اصبح مندوب الله على الارض والحاكم بأمره ويشتغل في العالم وتلاقيهم لا حافظين القرآن ولا عارفين من السنة  أي كلمة غير كام حديث على كام آية بيرددوهم زي البغبغنات ..

حابب بس اعترف  اني من حزب الكنبة اللي بيقعد يمصمص شفايفه على كل الاخبار وهو متضايق لكن عشان شايف انه دي الفرصة او المحاولة الاخيرة والوقت بدل الضايع الي نقدر نلحق فيه مصر او تضيع فاانا هنزل ومش خايف لا من امن ولا من ميليشيات الاخوان ولا حزب الحرية والعدالة بس لو حد قربلي ناوي ادافع عن نفسي والبادي اظلم ( ده في شرع ربنا ) .

وبما ان مفيش مشروع نهضة وطلعت كلام لا يودي ولا يجيب وباعولنا التروماي واكلنا الاونطة وكله طلع على فاشوش يعني لو سيبنالهم البلد ممكن او اكيد اخرتها سودا فكل واحد فينا يختار وعن نفسي انا اقنعت اصدقائي من حزب الكنبة بالنزول وكل واحد يا جماعة ييجي يشارك في ميدان التحرير او محافظته ضد قرارات محمد مرسي  والاعلان الدستوري الباطل ،  انا عارف انه مفيش حد معاه عصاية سحرية عشان يخلي مصر جنة او يحولها لدولة عظمى بين يوم وليلة ، لكن شايف انهم يعني الاخوان المسلمين والجماعة السلفيين والتانيين تبع الجماعة الاسلامية (اللي كانوا بيقتلوا في المدنيين مننا  ) في نفس الوقت عايزين  ياكلوا البلد وخيرها ويطلعوا عين اهالينا في الاخر بحجة تطبيق شرع الله مع انه ربنا اللي ها يحاسبنا مش هما ولو مؤمنين بجد مكانوش فضلوا يحسبونا على كل نفس وكل كلمة الواحد بينطقها ،عشان كده دي اخر فرصة بعد كده لا هايكون في مظاهرات ولا مين يحزنون كله ها يتمنع بامر الرئيس وانت ساعتها ماتزعلش ولا تلوم الا نفسك لما تاخد على قفاك، ولما الاجيال الجاية تلعننا وتلعن ام الثورة .

 

 

اقرأ ايضاً صفحات رأي متعلقة على جريدة احداث اليوم:

اضيف بتاريخ: Monday, November 26th, 2012 في 14:41

كلمات جريدة احداث: ,

اترك تعليقاًً على هذا الرأي