أشرف صقر

انتخابات مجلس النوب

برلمان تـيـك آوي

إللى بيحصل فى البلد عمره ميعجب حد غير إللى نفسه هيا همه , قرارات كتير كده سلق بيض , تيك آوي وكله عالسريع , للى بيزعل طبطبه وقرار سريع يسد جوع , مش أى أكل فيه غِذا , قالوا العدد ده فى اللمون , وكلام كتير كده فى الهوا , دا كلام وبس , من فنجرية بُق , وإللى هيمشى وراه أكيد يرجع ورا , بقرار إزاله عالسريع هدينا بيت فاسد وكل واحد كان فى إيده مطرقه , قالوا هنبنيها البلد , مصر الجديده دى بيت كبير , والبيت دا محتاج بنايين , مجلس لشعب ده أساس هيشيل وفوقه هموم كتير , أساس وعايز بنايين خبره وصنعة معلمين , دا أساس وهوا أهم شىء , وإللى بيحصل كروته , إقلب قوام أصل الزبون عايز يخلص عالسريع , وحيطان تِلمه قوام قوام , ويوم متتشرخ يكون ترميم سريع , أصل الزبون بردان بيحلم بالدفا , وأهى أى حاجه تِمَشى حال لو حتى تبقى بلكلكه , للبنايين فيه إختيار , وكله ييجى بإنتخاب , ووشوش كتير للبنايين , منهم وليهم الإحترام , عمال كتير وفلاحين , كل إحترامى كمان لناس وغير مِتعلمين , إخوان كتييرفيه بنايين , والسلفى واقف فى إنتظار يكون كمان من بنايين , علمانى ليبراللى فيه كمان وفلول كمان مِتخفيين , الكل واقف فى إنتظار , وكل واحد فاكر إنه شيخ البنايين , وعنين هتطلع عايزه كرسى فى الأساس , عنين هتطلع عالأساس أصل الأساس هوا الأساس , لو وصلوا ليه هيوصلوا منه و بيه لأى دور , بس المهم يكون وصول , وإزاى يكون , بالكروته , قالوا إنتخاب للبنايين , وإللى هينتخبوا كتيييير , كتير قوى مش فهمانين إيه هوا شغل البنايين , والبنايين فى السوق كتيير , وبقول لهم الوقت ده مش وقتكم , دا مجلس الشعب إللى جاى هنبنى بيه كل إللى جاى , والبنايين مش أى أى , البنايين بيكونوا ساسه ورجال قانون البنايين والإقتصاد ليه بنايين , علماء كتير وفى كل شىء , ورجال لدين متنوريين , أستاذ فى جامعه ده مكانه , وكل بَنا يزين مكانه , من كل دول لازم يكون مجلس لشعبنا المَصون , والبنايين دول شغالين بإيدين وخشنه معروفين , إيديين وقال عنها الرسول , دى إيدين يحبها ربنا , إخلاص فى شغل البنايين لهرم جديد عايزين يكون , مش بنايين تسرق لطوب وبكروته وخبره مفيش يتهد بيت وبعدها نسمع صوييت , يُفط كتيير ليها بأشوف ودعايه خايبه لبنايين ميفرقوش بين مسطريين أو للشاكوش , دول مُحدثين مهنه وعالبُنا متدربوش , ليكوا إحترامى كلكوا , لكنكم , عمرى مايخطر يوم فى بالى إن البلد هيكون بُناها ببنايين كده زيكوا , إنسوا تكونوا للأساس م البنايين , أصل البُنا بيعوز لناس متدربيين , ومنيين هييجوا طول عمركم عالكروته متعوديين , لازم لكم دورات كتيير تخلص يادوب بعد سنه , دورات كمان للشعب فيها نِعلمه إزاى يفرق بين صنايعى وبين صبى ممسكش يوم المسطريين , وبعدها نقدر نقول فيه إختيار بالإنتخاب للبنايين , لكن كتير من إللى بيفكروا نفسهم من البنايين مستعجلين , مستعجلين قوى عالبُنا , وكلامى ليهم أقول لهم , مستعجلين , فى الحاله دى ممكن يكون فيه إختيار لبنايين جاهزين وخبره مِدقدقين وعالفرازه مِعديين , وإللى هيختار دى لجان من كل أطياف البلد , يختاروا مجلس شعب نعرف بيه نأسس للبلد , إللى بيحصل كروته والبنايين الموجوديين يادوب هيبنوا فى النجوع دوار بطين , مصر الجديده عايزه أحسن بنايين وبيفهموا فى الهندسه وأساسها ده لازم يكون خرسانه جامده مع الحديد , دا أساس وحِمله تقيل ومش هتنفع لكلكه , وإللى بيحصل إيه يكون غير سلق بيض وأساس يكون كده عالسريع , ده برلمان تيك آوي .

اقرأ ايضاً صفحات رأي متعلقة على جريدة احداث اليوم:

اضيف بتاريخ: Tuesday, November 15th, 2011 في 02:07

كلمات جريدة احداث: , ,

اترك تعليقاًً على هذا الرأي