بقى لينا ريس

وتلات سنين و أكتر وأنا مستنى ريس , أصل الحكاية البلد محتاجة ريس , دى الفوضى عَمت , والنفس غمت , من هرجلة وهرتلة بكلام مهيس , وبلد ورايحة لسكة إللى مصيره مش كويس , قابيل , هابيل , صبحت علاقتنا ببعـض , وكل واحد مننا فاكر إنه وحده بفكره ريس , الثورة قامت ولجام وسابت , والعـيـل إللى لسة لمؤاخذة … صبح خلاص عـياره فالت , هيبتنا ضاعـت , الثورة غـرت الكتير والكل عامل فيها ريس , فاكرينها تركة , ولكل واحد فيها حته , وهدف وتاه وسط الطمع , وسط الجشع , وسط الأنانية وكدب كتير ودا مايجيب لخير , والكيل طفح وفاض ياريس .
بقى لينا ريس , بقى فيه أمل , لأ قول آماااال , دا الصبر طال ومشتاقين , عايزين أمان زى إللى كان , عايزين رخاء , ناكل ونشرب إللى نفسنا تيجى ليه , عايزين نعـلم العـيال تعـليم كويس , عايزيين طبيب , عايزيين علاج , عايزين كمان طريق كويس , عايزين نجهـز البنات , أما الولد عايز وظيفة وكمان سكن معـقـول ياريس , الكبت بيجيب إنفجار ودا إللى صار , خلى الشباب ف عـنيك ياريس , النور كمان ميتقطعـش , أنبوبة البوتوجاز كمان عايزين نحس لها بأمان وسعـرها يبقى رُخِـيص , أما الرغـيف عـينى عـلية ضعـفـان سُـفـيف , عايزين ولما ييجى الصيف كمان نصيف , عايزين نحس بالإحترام وكل واحد ليه مقام , والعـدل يتعـمم ياريس , أما الفساد دا يعـوز علاج , يستأصله جراح كويس , مطلوب إدارة , مطلوب نظام , مطلوب خطط وعـنينا على بكرة ياريس , وجيرانا ليهم كل خير , وإللى مايجى منه خير نأمن لشره , علاقتنا هتكون بالجميع وبالتوازن دا الماضى بيعـلم ياريس .
بقى لينا ريس , وأملنا فـيه يخاف وفـينا ربنا , وفيه مثل أهديه وليه , لو للى قبلك كان دوام ماصار إليك إللى إنت فيه .
بقى لينا ريس , ومننا فـيه له دعاء , الله يعـين , دا التركة صعـبة والعـين عـليك , ولو تكون م المخلصين ملايين سند هيكونوا ليك , مبروك ياريس , مُشفق عـليك .

اقرأ ايضاً صفحات رأي متعلقة على جريدة احداث اليوم:

• العـقـل فـين !!!
• مصـر بتفـرح
• عـفـريت لكـل مواطـن
• ياخـيـر أمـة
• ألتراس مصراوى