محمد خالد حمزة

احداث مصر

محاسبة المسئولون عن ازمة الطاقة في مصر

يعني احنا خير اللهم اجعله خير صحينا الصبح اكتشفنا إن عندنا أزمة طاقة!!
ماهو إما دي كانت أزمة متوقعة من سنين يبقى تجيب المسئولين من سنين وتحاسبهم عملوا إيه علشان يتجنبوها يا إما هما مكانوش متوقعينها ودي في حد ذاتها مصيبة أكبر وفي الحالتين أنا كمواطن انت عمال تقطع عني الكهربا يوميا لازم اشوف حد بيتعاقب قصاد كده

متقوليش مفيش تقصير أكيد الوضع المنيل اللي احنا فيه ده نتيجة تقصير مسئول ما
وطالما في تقصير يبقى في حساب وعقاب

وماتقوليش الكهربا كانت بتقطع زمان في الأرياف بس القاهرة وسكانها مكانوش بيحسوا، لو كانت بتقطع زمان في الأرياف فهي دلوقتي بتقطع ضعف اللي كانت بتقطعه، و آدي القاهرة وكل المحافظات أهي بتقطع فيها فبلاش الحجة الخايبة دي

وماتقوليش حنستنى خمس سينين كده علشان تتحل، هو في بلد بيقطع فيها النور يوميا ٦ ساعات حتقوم ولا حتشوف سياحة ولا حتى حتكسب شلن

وبعدين إزاي أيام مرسي اللي كان بيهرب الكهربا بسولارها لغزة النور يقطع أقل ما بيقطع دلوقتي!!
وماتقوليش تفجير الأبراج السبب وتسكت!! ، لو تفجير الأبراج السبب يبقى تجيب الباشا وزير الداخلية وتقول له قدامك يومين تجيب اللي فجر أي برج كهربا من عرقوبه وتعلقه ع برج كهربا ضغط عالي وتترك الكهربا تاخد تارها منه، ماهو لو سعادته مش عارف يجيبهم يبقى يريح ضهره في بيتهم ويتابع الوضع ع أضواء الشموع

ولا دي كمان محتاجة تفويض؟

هو بالمناسبة يعني تفويض الناس للكهربا حيبقى أكتر من تفويضهم للقضاء ع الإرهاب

الناس عندها استعداد تفوض واحد بشورت لو التفويض حيجيب فولت

الخلاصة يعني الوضع مقرف والمسئولين من الكبير للصغير وطريقة تعاملهم مع الموقف تقرف أكتر

اقرأ ايضاً صفحات رأي متعلقة على جريدة احداث اليوم:

اضيف بتاريخ: Friday, August 8th, 2014 في 05:22

كلمات جريدة احداث: ,

اترك تعليقاًً على هذا الرأي